Ipotekaǵa páter alýda bastapqy jarna retinde zeınetaqy jınaǵyn paıdalaný usynyldy
ASTANA. 9 qarasha. QazAqparat /Rýslan Ǵabbasov/ - Búgin Astanada turǵyn úı máselesine arnalǵan dóńgelek ústelde QR Qurylys jáne turǵyn úı -kommýnaldyq sharýashylyq isteri agenttiginiń tóraǵasy Serik Nokın ıpotekaǵa páter alýda bastapqy jarna retinde zeınetaqy jınaǵyn paıdalanýdy usyndy.
«Ipoteka boıynsha páter alý kezinde bastapqy jarna retinde zeınetaqy jınaǵyn paıdalaný máselesin zerdeleý durys bolady dep sanaımyz», - dep atap ótti S. Nokın.
Agenttik basshysynyń sózine qaraǵanda, Sıngapýrde búginde bul baǵytta, ıaǵnı zeınetaqy jınaǵyn paıdalaný arqyly ıpotekalyq nesıeleý júıesin damytý sharalary turǵyn úıge qol jetkizgenderdiń úlesin 3 eseden astam kórsetkishke arttyrǵan. Atap aıtqanda, 2007 jyldaǵy 27 paıyzdan qazirgi kezde 91 paıyzǵa deıin artyp otyr.
«Sıngapýrde turǵyn úı qurylysyn arnaıy qurylǵan memlekettik uıym júzege asyrady. Eger de turǵyn úı qurylysyn damytýdyń alǵashqy kezeńinde onda arzan ári shaǵyn úı-jaılardy salyp kelgen bolsa, al qazirgi kezde memlekettik turǵyn úılerdiń parametri aıtarlyqtaı arta tústi», - dedi ol.
Sonymen qatar agenttik basshysy ıpotekanyń qol jetimdiligin arttyrý baǵytynda 8 paıyz kóleminde jyldyq syıaqy mólsheri, 10 paıyz bastapqy jarna, sondaı-aq 20 jyl nesıelendirý merzimi bolýy tıis ekenin jetkizdi.
