«Ipotekaǵa deıingi kiltter»: armanyńa bir qadam jaqynda
ASTANA. KAZINFORM — Bolashaqta baspana alýdy josparlap júrgender úshin jańa ıpotekalyq joba iske qosyldy. Jobanyń ereksheligi Otbasy bank salymshylary nesıeni rásimdegenge deıin jańa páterge kóship bara alady. Bul Otbasy banktiń jáne seriktes NEST STROY qurylys kompanııasynyń birlesken jobasy aıasynda júzege asady.
«Ipotekaǵa deıingi kiltter» dep atalatyn jańa jobanyń tusaýkeseri ótken senbide Almaty oblysyna qarasty Gate City turǵyn úı kesheninde ótti. Jalpy aýdany 300 myń sharshy metr bolatyn 5 000 páterge arnalǵan bul turǵyn úı kesheni Almaty mańynda ornalasqan jańa tehnologııalyq Alataý qalasynda boı kótergen. Ipotekalyq baǵdarlamanyń kalaı júzege asatynyn Otbasy banki basqarma tóraǵasynyń orynbasary Nurlan Aqshanov túsindirip berdi.
— Biz jańa Alataý qalasynyń irgesindegi Gate City turǵyn úı keshenindemiz. Seriktesimiz NEST STROY qurylys kompanııasymen birlesip, «Ipotekaǵa deıingi kiltter» atty joba ázirledik. Banktiń mıllıondaǵan salymshylaryna málim qaǵıdasy ózgerissiz qalady, ol — jınaqtaý. Klıentterimizge eldegi eń qoljetimdi baǵdarlamalarmen baspana alýǵa múmkindik beretin de dál osy jınaǵan jınaqtary. Ipoteka rásimdeý kezinde keıbir salymshylarymyzdyń baǵalaý kórsetkishterin kóterýge ýaqyt kerek bolady. Al osy ýaqyt aralyǵynda salymshylar týystaryn jaǵalap, bolmasa páter jaldaı turýǵa týra keledi. Baǵdarlama boıynsha aralyq nesıeniń eń joǵary mólsherlemesi jyldyq 8,5% bolady*. Ony alý úshin depozıtte qaryz somasynyń 50%-yn jınap, baǵalaý kórsetkishin 5 deńgeıine deıin jetkizý qajet. Eger depozıt jańa bolsa, ádette bul kórsetkishke alty aı ishinde qol jetkiziledi. Osy kezeńdi kútpesten, depozıtke aqsha salǵannan keıin birden páterge qonystanýǵa múmkindik beredi. Al ıpotekany keıinirek, depozıt boıynsha barlyq sharttar oryndalǵan kezde rásimdeýge bolady, — dedi Nurlan Aqshanov.
Jańa jobamen tanysýǵa kelgen bank salymshylary men turǵyndarǵa taza árlengen ári jıhazdary daıyn 1-3 bólmeli úıler tanystyryldy. Ipotekaǵa qatysý úshin qandaı múmkindikter qarastyrylǵanyn NEST STROY qurylys kompanııasynyń basshysy Aleksandr Nestertsev aıtyp berdi.
— Gate City turǵyn úı kesheninde 3 000 sharshy metrdi bolatyn úıler salyndy. Biz Otbasy bankimen birlesip turǵyn úı jaǵdaıyn jaqsartqysy keletin jandarǵa jańa joba ázirledik. Qazir barlyq páterler paıdalanýǵa berilgen ári qonystanýǵa tolyqtaı daıyn. Turǵyn úı taza árleýde jáne negizgi jıhazdarmen usynylady. Páterde tósek, as úı jıhazy, garderob bar. Bul qonys aýdarýshylar úshin óte yńǵaıly. Páterdi jóndeýge aqsha jumsaýdyń qajeti joq jáne jıhaz satyp alýǵa ketetin otbasylyq bıýdjetti aıtarlyqtaı únemdeýge bolady. Turǵyn úı kesheniniń aýmaǵynda mektep salynyp qoıǵan, ol osy jyldan bastap jumys isteıdi. Kelesi jyly balabaqsha ashý josparlanýda. Sondaı-aq jol ınfraqurylymy daıyn jáne kólik qatynasy uıymdastyrylǵan, — dedi Aleksandr Nestertsev.
Baǵdarlamaǵa qatysý barynsha qarapaıym. Bank klıenti Gate City turǵyn úı kesheninen páter tańdap, ony brondaıdy. Otbasy bankke kelip, depozıt ashady jáne turǵyn úı qunynyń 50%-yn óziniń jınaq shotyna salyp, tólem qabilettiligin rastaıdy. Keıin klıent qurylys salýshymen alty aıǵa deıingi merzimge jalǵa alý shartyn jasasady. Kiltti alyp, páterge qonystanady. Osy kezeń ishinde depozıttegi baǵalaý kórsetkishi birtindep ósedi. Ol kem degende 5-ke teń bolýǵa tıis. Mundaı mánge ádette 6 aı ishinde qol jetkiziledi.
Baǵalaý kórsetkishi 5 deńgeıine jetkennen keıin klıent jyldyq 8,5%* mólsherlememen aralyq qaryz alady jáne qurylys salýshymen satyp alý-satý shartyn jasasady. Bul rette klıent turǵyn úıdi jalǵa alý aqysyn tólemeıdi. Tek kommýnaldyq qyzmetterdi ǵana tóleıdi.
«Ipotekaǵa deıingi kiltter» jobasy aıasynda tanystyrylymǵa kelgen bank salymshylary men qonaqtary jańa ıpotekalyq baǵdarlamanyń sharttaryna qyzyǵýshylyq tanytyp, bolashaqta osy jobaǵa qatysýǵa nıetti ekenderin aıtty. Almatylyq Mádına Muratovaǵa turǵyn úıdiń sapasy unapty.
— Ádette úı tańdaǵanda qurylys materıaly men sapasyna mán beremiz. Búgingi sharaǵa qurbym ekeýmiz keldik. Almaty qalasynda 1 bólmeli úıim bar. Aldaǵy ýaqytty úıimdi satyp, Otbasy bankinen jınaq ashtyryp osy joba arqyly 2 bólmeli úı alýdy josparlap otyrmyn. Mundaǵy úıler jańa ári sapaly, jóndeý jumystaryna da qosymsha qarjy shyǵarmaısyń. Tipti jıhazdary da daıyn. Osy jaǵynan tıimdi tustary kóp eken», — dedi Mádına Muratova.
Al almatylyq Aıdana Asylbekova joldasy ekeýi Otbasy bankinde birneshe jyldan beri jınaq jınap keledi.
— Jańa ıpotekalyq baǵdarlama biz sııaqty jas otbasylarǵa tıimdi eken. Jınaqtan bólek baǵalaý kórsetkishin kóterý úshin jarty jyl turýǵa bolady. Eń bastysy ústeme paıyzdary da az. Al úı baǵasy Almaty qalasyndaǵy baǵalarǵa qaraǵanda tıimdi. Qurylys kompanııasy usynǵan sharttarmen tolyqtaı tanysyp, aldaǵy ýaqytta oń sheshim qabyldaıtyn shyǵarmyz. Biz bolashaǵymyzdy oılap, Otbasy bankimen óz armanymyzdy júzege asyramyz degen oıdamyz, — dedi Aıdana Asylbekova.
«Ipotekaǵa deıingi kiltter» jobasy otbasyǵa qonys toıyn keıinge qaldyrmaýǵa múmkindik beredi. Olar tańdalǵan páterge birden kóship kire alady, al nesıeni keıinirek rásimdeıdi.
* (JTSM 9% bastap 9,6% deıin)
