Ipoteka jáne saqtandyrý: ár qaryz alýshy neni bilýi kerek
ASTANA.KAZINFORM — Qarjy naryǵyn retteý agenttigi ıpotekalyq nesıe rásimdegen kezde qaryz alýshynyń ómirin saqtandyrý boıynsha qandaı mańyzdy máselelerdi bilý keregin eke saldy.
Agenttik qaryz alýshynyń ómirin saqtandyrý — bul qaryz alýshy men onyń otbasyn aýyr syrqattanǵan, eńbekke qabilettiliginen aıyrylǵan nemese qaryz alýshy qaıtys bolǵan jaǵdaıda kredıt tóleý jónindegi mindettemelerden qorǵaıtyn erikti saqtandyrý ónimi ekenin jazdy.
Standartty saqtandyrý sharty neni jabady?
Saqtandyrýdyń bul túri qaryz alýshynyń jazataıym oqıǵa nemese aýrý saldarynan qaıtys bolýdy, I nemese II toptaǵy múgedektikti taǵaıyndaýdy ne múgedektik tobyn bere otyryp, eńbekke qabilettiligin joǵaltýdy jabady. Sondyqtan ıpotekany rásimdeý kezinde bankter qaryz alýshylarǵa ómir men eńbekke qabilettilikti saqtandyrýǵa jıi keńes beredi.
Saqtandyrýdyń bul túri qalaı jumys isteıdi?
Adam qaıtys bolǵan nemese eńbekke qabilettiliginen tolyq aıyrylǵan jaǵdaıda saqtandyrý kompanııasy bankke kredıt boıynsha qaldyqty tóleıdi. Sonymen birge ýaqytsha eńbekke jaramsyz bolǵan jaǵdaıda (mysaly, aýrýyna baılanysty) saqtandyrý kompanııasy qalpyna kelý kezeńinde kredıt boıynsha aı saıynǵy tólemderdi jaba alady.
Qaryz alýshy úshin basty artyqshylyq — jaqyndarynyń qarjylyq qaýipsizdigi. Saqtandyrý jaǵdaıy bastalǵan kezde saqtandyrý tólemi otbasynyń menshigindegi baspanany saqtaýǵa jáne qosymsha borysh júktemesin boldyrmaýǵa múmkindik beredi.
Bul rette saqtandyrý shartyna qol qoımas buryn onyń barlyq sharttarymen, ásirese saqtandyrý tólemi júrgizilmeıtin aıryqsha jaǵdaılar tizbesimen muqııat tanysý mańyzdy.
Eger saqtandyrý bolmasa nemese tólemnen bas tartylsa, ıpoteka ne bolady?
Eger qaryz alýshynyń ómirin saqtandyrý sharty bolmasa nemese saqtandyrý uıymy tóleýden bas tartsa (mysaly, eger jaǵdaı sharttyń erekshe jaǵdaıyna jatatyn bolsa), onda ıpoteka boıynsha mindettemeler avtomatty túrde toqtatylmaıdy.
Mundaı jaǵdaıda bereshek muranyń quramyna kiredi, al murany qabyldaǵan muragerler muraǵa qaldyrylǵan múliktiń quny sheginde mura qaldyrýshynyń boryshtary boıynsha jaýapkershilik atqarady.
Qaryz alýshynyń ómirin májbúrli túrde saqtandyrý — zańǵa qaıshy
Qaryz alýshynyń ómirin saqtandyrý — saqtandyrýdyń erikti túri. «Qazaqstan Respýblıkasyndaǵy bankter jáne bank qyzmeti týraly» zańǵa sáıkes banktiń bul qyzmetti alýdy májbúrleýge nemese ony kredıt alý úshin mindetti shart retinde belgileýge quqyǵy joq.
Paıdaly materıaldar Fingramota.kz saıtynda qoljetimdi.
Eske sala keteıik, saqtandyrý men baǵaly qaǵazdar naryǵyn retteıtin jańa zańdar ázirlenedi.
