Ipoteka uıymdarynyń kapıtaly 4 aıda 16 mıllıard teńgege kóbeıgen

ASTANA. KAZINFORM — Ulttyq bank eldegi ıpotekalyq uıymdardyń 4 aıdaǵy tabysy men shyǵyny týraly derek jarııalady.

2025 jyldyń 1 qańtarynda eldegi ıpotekalyq uıymdardyń jıyntyq aktıvi 1 trln 576 mlrd 852 mln 239 myń teńge bolsa, sáýirdegi jaǵdaı boıynsha 1 trln 605 mlrd 550 mln 885 myń teńgege jetken. Onyń ishinde kapıtal jıyntyǵy 259,9 mlrd teńgeden 275,9 mlrd teńgege artqan nemese 16 mlrd teńge ósim bar. Al mindettemeler jıyntyǵynyń ósimi — 12,7 mlrd teńge. 

Muny qarapaıymdap aıtsaq, ıpotekalyq uıymdardyń barlyq múlkiniń, aqshasy men basqa qundylyqtarynyń jalpy somasy 4 aıda 1,576 trln teńgeden 1,605 trln teńgege jetken.
Onyń ishinde uıymdardyń jeke qarajaty men rezervteri 259,9 mıllıard teńgeden 275,9 mıllıard teńgege artyp, 16 mıllıard teńge ósim kórsetken.

Al basqa adamdar men uıymdar aldyndaǵy bereshegi 12,7 mıllıard teńgege artqan.
ıAǵnı, ıpoteka uıymdarynyń jalpy jaǵdaı jaqsarǵanymen, qaryzy da kóbeıe túsken.
Sondaı-aq, ıpotekalyq uıymdardyń syıaqy alýmen baılanysty kirister jıyntyǵy (halyqqa bergen ıpotekadan paıyz túrinde alatyn tabys — red) 1 aqpanda 15,6 mlrd teńge bolsa, 1 sáýirdegi jaǵdaı boıynsha 46,3 mlrd teńgege jetken.

Syıaqy alýmen baılanyssyz kirister aqpan aıynda 6,8 mlrd teńge bolsa, 1 sáýirde 9,7 mlrd teńge bolyp ózgergen.

4 aıdyń ishinde ıpoteka uıymdarynyń tabys salyǵyn eskergendegi barlyq shyǵystary 37,9 mlrd teńge bolǵan.