Ipoteka boıynsha jyldyq tıimdi syıaqy mólsherlemesi 20%-ǵa tómendedi

ASTANA. KAZINFORM — Qarjy naryǵyn retteý jáne damytý agenttigi men Ulttyq banktiń birlesken «Jyldyq tıimdi syıaqy mólsherlemesiniń shekti mólsherlerin aıqyndaý týraly» qaýlysyna ózgeris engizildi. Qujat jobasy «Ashyq NQA» portalynda jarııalandy. 

Ózgeristerge sáıkes jyldyq tıimdi syıaqy mólsherlemesiniń shekti mólsheri:

— ekinshi deńgeıdegi bankter, bank operatsııalarynyń jekelegen túrlerin júzege asyratyn uıymdar beretin bank qaryzdary boıynsha, kepilsiz bank qaryzdary boıynsha 46%;

— kepilmen qamtamasyz etilgen bank qaryzdary boıynsha 35% ıpotekalyq turǵyn úı qaryzdary boıynsha 20%;

— mıkroqarjylyq qyzmetti júzege asyratyn uıymdar beretin mıkrokredıtter boıynsha — 46%.

— Mıkroqarjylyq qyzmetti júzege asyratyn uıymdar kúntizbelik 45 kúnge deıingi merzimge, respýblıkalyq bıýdjet týraly zańda tıisti qarjy jylyna belgilengen aılyq eseptik kórsetkishtiń 45 eselengen mólsherinen aspaıtyn mólsherde beretin mıkrokredıtter boıynsha kúnine 0,3%-dan az, biraq 179%-dan aspaıtyn mólsherde bolyp aıqyndalsyn, — delingen qujatta.

Mıkrokredıtter «Mıkrokredıt berý týraly shartty jasasý tártibin, onyń ishinde sharttyń mazmunyna, resimdelýine jáne mıkrokredıttiń tolyq quny týraly aqparatty qamtıtyn onyń birinshi betine, mıkrokredıt berý týraly sharttyń mindetti sharttaryna qoıylatyn talaptardy, sondaı-aq mıkrokredıtti óteý kestesiniń nysanyn bekitý týraly» Ulttyq banktiń 2019 jylǵy 29 qarashadaǵy № 232 qaýlysynda kózdelgen mólsherlememen beriledi.

— Banktik qaryz shartyn, mıkrokredıt berý týraly shartty jasasý, banktik qaryz, mıkrokredıt boıynsha syıaqy mólsherlemesin ózgertý jáne banktik qaryzdy berýge jáne oǵan qyzmet kórsetýge baılanysty jańa komıssııalar men ózge de tólemderdi ózgertý nemese engizý kúngi jaǵdaı boıynsha jyldyq tıimdi syıaqy mólsherlemesi aıqyndalǵan shekti mólsherden aspaýǵa tıis, — dep jazylǵan qaýlyda.

Buǵan deıin elimizdegi tıimdi ıpotekalyq baǵdarlamalar týraly jazǵan edik. 

Aıta keteıik, bıyl ıpoteka uıymdarynyń kapıtaly 4 aıda 16 mıllıard teńgege kóbeıgen.