Ipoteka barynsha qoljetimdi bolady - Jeńis Qasymbek

ASTANA. QazAqparat - Búgin QR Investıtsııalar jáne damý mınıstri Jeńis Qasymbek «Nurly jer» baǵdarlamasy boıynsha atqarylatyn jumystar týraly esep berdi. Osy oraıda ol ıpotekany barynsha arzandatý máselesine de toqtaldy, dep habarlaıdy QazAqparat tilshisi.

Mınıstrdiń aıtýynsha, ótken jyly Qazaqstannyń ıpotekalyq kompanııasy arqyly turǵyn úı nesıelerin sýbsıdııalaý sharalary bastalǵan bolatyn. «Nurly jerdiń» osy baǵyty aıasynda ıpotekanyń 6 paıyzy memleket tarapynan óteledi. Sonda ekinshi deńgeıli bankterden alynǵan ıpotekanyń jyldyq mólsherlemesi 10 paıyzdan aspaıdy.

«Ótken jyldyń ekinshi jartysynda ótinishter qabyldana bastady. Sodan beri 1 388 ıpotekaǵa ótinim berildi. Sýbsıdııanyń jalpy somasy 14,2 mlrd teńgeni qurady. Osy ýaqytqa deıin 1 317 ótinim maquldandy. Osy oraıda Bank TsentrKredıt, Sberbank, ATF pen VTB-nyń belsendiligin atap ótken jón», - dedi J.Qasymbek Úkimettiń búgingi otyrysynda.

Alaıda bankter tarapynan atalǵan baǵdarlamaǵa úlken qyzyǵýshýlyq bolǵan joq. Sebebi teńgemen quıylǵan qarjynyń tapshylyǵy bar. Budan bólek, bank zańnamasy da qatań bolyp tur.

«Osyǵan baılanysty bankterdiń ıpotekalyq nesıelendirý sharalaryn kúsheıtý týraly sheshim qabyldandy. Sol sebepti Ekonomıkany jańǵyrtý jónindegi ulttyq komıssııasy Qazaqstannyń ıpotekalyq kompanııasy arqyly ekinshi deńgeıli bankterde 50 paıyzǵa deıingi qarjyny ornalastyrýdy qoldady. Qazirgi kezde atalǵan mehanızm boıynsha barlyq máseleler Ulttyq bankpen birge pysyqtalyp jatyr. Bıylǵy jyldyń basty maqsaty - halyqqa barynsha qoljetimdi ıpotekany ázirleý. Osyǵan oraı, tıisti mehanızmder engiziledi», -dep atap kórsetti J.Qasymbek.

Aıta keteıik, Úkimettiń búgingi otyrysynda Jeńis Mahmuduly bıyl paıdalanýǵa beriletin arendalyq páterlerdiń sanyn jarııalady.

Sondaı-aq, qaı oblysta jer ýchaskeleriniń kóptep beriletinin de aıtyp berdi.