Ipoteka alatyndar azaıyp, kepilsiz nesıege suranys artty
Bankterge birinshi toqsanda 127,5 myń ótinim tústi
Qazaqstanda birinshi toqsanda ıpotekalyq jáne kepildik nesıelerge suranys tómendegen. Al kepilsiz qaryzdarǵa degen suranys 8%-ǵa, avtonesıege 7%-ǵa ósti.
Elimizde birinshi toqsanda ıpotekalyq nesıege suranys 13%-ǵa tómendegeni baıqalǵan. Bul 194 myń ótinim azaıǵanyn bildiredi. Almaty men Astanada suranys birden 20% - ǵa tómendegen.
Ulttyq bank negizinen iri bankterdegi kórsetkish tómendegenin habarlady. Al naryq qatysýshylary muny «7-20-25» memlekettik baǵdarlamasy sheńberinde aı saıynǵy lımıtterdiń tez ıgerilýimen, maýsymǵa oraı suranystyń azaıýymen jáne nesıe boıynsha mólsherlemeniń tómendeýimen túsindiredi.
«Ipotekalyq qaryzdar qunynyń ósýi keıbir bankterdegi baǵdarlamalar boıynsha ıpotekalyq nesıeleýdiń azaıýyna áser etti», – dep atap ótti Ulttyq banktiń Qarjylyq turaqtylyq jáne zertteýler departamentiniń dırektory Oljas Kúbenbaev.
Ipotekaǵa ótinim berýdiń ortasha somasy toqsan ishinde 4%-ǵa nemese 700 myń teńgege ósip, 17,2 mln teńge bolǵan. Ótken jyldyń sáıkes kezeńimen salystyrǵanda, ortasha chek 1,6 mln teńgege ósken.
Birinshi toqsanda bankter barlyǵy 127,5 myń ótinimdi qarady, maquldaý deńgeıi (qaralmaǵan ótinimderdi esepke almaǵanda) 33,5% - dan 38% - ǵa deıin ósti. ıAǵnı, nesıelik ótinimderdiń úshten birinen sál astamy maquldanyp, qalǵan 60%-ynan bas tartyldy.
Kepilsiz qaryz alýǵa berilgen ótinimniń 30 paıyzy ǵana maquldandy
Kepilsiz nesıege suranys belsendi túrde ósip jatyr. Mysaly, birinshi toqsanda bul kórsetkish 2022 jyldyń tórtinshi toqsanymen salystyrǵanda 8%-ǵa artqan. Birinshi toqsanda qazaqstandyqtar kepilsiz qaryz alýǵa 15,9 mln ótinim bergen. Al bankter onyń tek 30 paıyzyn maquldady.
Kelip túsken ótinimder boıynsha, nesıeniń ortasha somasy 56%-ǵa ósip, 921 myń teńgege jetken.
Jeke iri banktegi suranystyń tómendeýine baılanysty tutynýshylyq nesıelerge suranys edáýir azaıdy. Qaryz alýǵa baılanysty kelip túsken ótinimder sany 37%-ǵa, ıaǵnı 11 myń ótinimge deıin qysqarǵan. Al nesıelik uıymdar klıentterge qoıylatyn talapty kúsheıte bastady. Sóıtip, ótinishterdiń 30% ǵana maquldanǵan.
Avtonesıe sharttary jeńildedi
Bankter 1 toqsanda avtonesıege suranys artqanyn anyqtady. Kelip túsken ótinimder sany 7%-ǵa, ıaǵnı 532 myń ótinimge deıin kóbeıgen. Saýalnamaǵa qatysqan bankter muny avtomobılderdi alý merziminiń qysqarýymen, naryqtaǵy tapshylyqtyń tómendeýimen jáne jeńildetilgen avtonesıeleý baǵdarlamasymen baılanystyryp otyr.
Ulttyq bank avtonesıe sharttarynyń jeńildegenin atap ótti. Alaıda jekelegen iri bank kredıttik lımıtti qysqartyp, klıentterdiń tólem qabiletine qoıylatyn talapty kúsheıtken. Osyǵan baılanysty ótinishterdiń shamamen 13 paıyzy maquldanǵan. Sonymen qatar kelip túsken ótinimder boıynsha, nesıeniń ortasha chegi 606 myń teńgeden 5,2 mln teńgege deıin ósti.
Bankter syıaqy mólsherlemesin qaıta qaraýy múmkin
Saýalnamaǵa qatysqan bankırler tutynýshylyq nesıeleý kórsetkishi birinshi toqsandaǵydaı bolatynyn aıtady. Bankter óz ónimderin usynýyna baılanysty ıpoteka men avtonesıege suranys artady.
Jalpy, bólshek nesıeleýde bankter nesıeleý sharttaryna aıtarlyqtaı ózgeris engizýdi josparlap otyrǵan joq. Sonymen qatar bankter QR UB bazalyq mólsherlemesi boıynsha syıaqy mólsherlemesin qaıta qaraýy múmkin.
