IPO, oblıgatsııalar, tsıfrlyq aktıvter: Qazaqstannyń kapıtal naryǵynda ne ózgeredi
ASTANA. KAZINFORM — Qazaqstan Respýblıkasynyń kapıtal naryǵyn damytýdyń 2026-2030 jyldarǵa arnalǵan baǵdarlamasy bekitildi.
Qarjy naryǵyn retteý jáne damytý agenttigi basqarmasynyń 2026 jylǵy 30 qazandaǵy № 143 jáne QR Ulttyq banki basqarmasynyń 2026 jylǵy 29 qazandaǵy № 125 birlesken qaýlysymen Qazaqstan Respýblıkasynyń kapıtal naryǵyn damytýdyń 2026-2030 jyldarǵa arnalǵan baǵdarlamasy bekitildi.
Baǵdarlama Memleket basshysynyń 2026 jylǵy 10 aqpandaǵy Úkimettiń keńeıtilgen otyrysynda berilgen tapsyrmasyn oryndaý úshin ázirlendi. Baǵdarlamany ázirleý kezinde kapıtal naryǵynyń jaı-kúıi taldandy, sondaı-aq osy sektordy retteý men damytý bóliginde ozyq halyqaralyq praktıkalar eskerildi.
— Búgingi kúni kapıtal naryǵy negizgi kórsetkishter boıynsha ornyqty ósýdi kórsetip otyr. Sońǵy bes jylda qazaqstandyq aktsııalar naryǵyn kapıtaldandyrý eki eseden astam — 19,1 trln teńgeden 41,8 trln teńgege deıin ulǵaıdy, ortasha jyldyq ósý qarqyny 22%-dy qurady. Boryshtyq baǵaly qaǵazdar naryǵy da is júzinde eki ese — 32 trln teńgeden 58 trln teńgege deıin ósti, — delingen komıtet habarlamasynda.
Baǵdarlamanyń basty mindeti — kapıtal naryǵyn bıznes pen ınvestorlar úshin odan da qoljetimdi etý jáne ony bankterdi kredıtteýmen qatar ekonomıkany uzaq merzimdi qarjylandyrýdyń tolyqqandy kózine aınaldyrý.
Kapıtal naryǵyn damytý baǵdarlamasy 7 strategııalyq baǵytty jáne 35 bastamany qamtıdy.
1. Investorlardyń ınstıtýtsıonaldyq bazasyn keńeıtý jáne ártaraptandyrý.
Baǵyt zeınetaqy aktıvterin basqarý tıimdiligin arttyrý jáne olardy naryqtyq ortaǵa tartý jónindegi sharalardy qamtıdy. Sondaı-aq, ujymdyq ınvestıtsııalardy damytý jáne balamaly jáne hedj-qorlardy qosa alǵanda, jańa kásibı basqarýshylardyń paıda bolýy úshin jaǵdaılar jasaý kózdeledi.
2. Boryshtyq baǵaly qaǵazdar jáne týyndy qarjy quraldar naryǵyn keńeıtý jáne ártaraptandyrý.
Banktik kredıtteýge balama qurý jáne táýekelderdi basqarý quraldarynyń naryǵyn qalyptastyrý maqsatynda korporatıvtik oblıgatsııalardy yntalandyrý, sekıýrıtılendirýdi damytý, memlekettik boryshty basqarýdy jetildirý jáne týyndy quraldardy damytý kózdeledi.
3. IPO-ny yntalandyrý jáne shaǵyn jáne orta bıznestiń aktsıonerlik kapıtal naryǵyna qoljetimdiligin keńeıtý.
Aktsıonerlik kapıtaldy tartatyn kompanııalar tobyn keńeıtý úshin bırjaǵa shyǵý rásimderin ońaılatý jáne tsıfrlandyrý, emıtentterdi daıarlaý baǵdarlamasyn qurý, salyqtyq yntalandyrýlardy engizý jáne lıstıng demeýshileri ınstıtýtyn engizý kózdeledi.
4. Aktsııalardyń qaıtalama naryǵynyń ótimdiligin arttyrý.
Aktsııalar aınalysnyń belsendiligin jáne baǵa belgileýdiń tıimdiligin arttyrý maqsatynda baǵaly qaǵazdardy qaryzǵa alý jáne kredıtteý tetigin engizý, qysqa satýdy damytý, market-meıkıngti jetildirý jáne halyqaralyq qoljetimdilikti keńeıtý kózdeledi.
5. Jańa quraldardy engizý jáne keńeıtý.
Baǵyt qarjy quraldarynyń jańa synyptaryn damytýǵa baǵyttalǵan. Tsıfrlyq qarjy aktıvterin, ESG-qarjylandyrýdy jáne kapıtal naryǵynyń ıslamdyq segmentin damytý kózdeledi.
6. Dármensizdik jáne qaıta qurylymdaý rejımderin jańǵyrtý.
Bereshekti retteý jáne kredıtorlardyń quqyqtaryn qorǵaý rásimderiniń boljamdylyǵyn arttyrý maqsatynda aldyn ala kelisilgen qaıta qurylymdaýdy resimdeý, oblıgatsııalardy ustaýshylar ókiliniń ınstıtýtyn kúsheıtý jáne transshekaralyq dármensizdik tetikterin jetildirý kózdeledi.
7. Retteýshilik ortany jetildirý.
Retteýdiń tıimdiligin arttyrý jáne qatysýshylarǵa artyq júktemeni azaıtý úshin qor bırjasynyń fýnktsııalaryn keńeıtý, lıtsenzııalaýdy jetildirý, táýekelge baǵdarlanǵan qadaǵalaýdy engizý jáne bırjadan tys mámilelerdiń ashyqtyǵyn arttyrý kózdeledi.
— Baǵdarlamany iske asyrý kapıtal naryǵynyń ornyqty damýyna, ishki jınaqtardy uzaq merzimdi ınvestıtsııalarǵa aınaldyrýǵa, bıznestiń naryqtyq qarjylandyrýǵa qoljetimdiligin keńeıtýge jáne Qazaqstan Respýblıkasynyń áleýmettik-ekonomıkalyq damýyndaǵy kapıtal naryǵynyń rólin arttyrýǵa yqpal etetin bolady. Kózdelgen sharalardyń edáýir bóligi «Kapıtal naryǵy týraly» Qazaqstan Respýblıkasynyń jańa Zańynyń jobasynda zańnamalyq túrde bekitiletin bolady, ony 2026 jyldyń sońyna deıin Qazaqstan Respýblıkasy Quryltaıynyń qaraýyna engizý josparlanyp otyr, — dep túıindedi vedomstvo.
Baǵdarlamanyń tolyq mátinimen agenttiktiń saıtynda tanysýǵa bolady.
Osyǵan deıin Alatau City-diń ınfraqurylymyna brıtandyq kapıtaldy tartý qaralǵanyn jazǵanbyz.
