iPhone-nyń dál kóshirmesin jasaǵandarǵa tseh ashyp bereıik - Baǵdat Mýsın
ALMATY. QazAqparat - QR Bas prokýratýrasynyń Quqyqtyq statıstıka jáne arnaýly esepke alý komıtetiniń tóraǵasy Baǵdat Mýsın «iPhone» telefondaryn qoldan jasap kelgenderge qatysty óz pikirin bildirdi.
«Jigitter iPhone qoldan jasaǵan?! Menińshe, olarǵa zańdy óndirispen aılanysýǵa múmkindik berý kerek. Bir tehnoparkten tehnıka jasaý tsehyn ashý kerek. Jeńildikpen qarjy berý kerek. Tsıfrly Qazaqstan týraly jarııaladyq emes pe?! Eger balalar túpnusqa platalarmen arzan bólshekterden iPhone jasap shyǵarǵan bolsa, olardyń qolynan kóp nárse keletini belgili. Sondaı-aq, kásipkerlik bastamalary jaman emes eken», - dedi Baǵdat Mýsın Feısbýktegi paraqshasynda.
Aıta ketý kerek, Almatyda «iPhone» markaly jalǵan smartfondar jasap kelgen tseh jumysy áshkerelengen bolatyn.
Qalalyq Memlekettik kirister departamenti qyzmetkerleri «Aerovokzal» saýda ortalyǵy aýmaǵynan «iPhone» markaly telefondar qurastyryp, qattap jatqan adamdardy ustaǵan edi .
Jedel-izdestirý sharasy aıasynda zańsyz taýardy Qazaqstannyń ózge aımaqtarynan kelgen jeke tulǵalarǵa, sondaı-aq Almatydaǵy Ortalyq ýnıversal dúkenine (TsÝM - avt.) ótkizip kelgen saýdagerler ustaldy.
Anyqtaý barysynda 30 dana «iPhone» telefony tárkilendi. Sarapshylardyń aıtýynsha, Almatyda qurastyrylǵan zańsyz telefondy túpnusqadan ajyratý óte qıyn. Sebebi, smartfondy qurastyrý barysynda jedel jady men «ortalyq protsesserdiń» túpnusqasy qoldanylǵan. Alaıda, gadjettiń ózge bólshekteri jalǵan ári arzan buıymdardan turady.
Іs boıynsha, QR QK 222-babymen (taýar belgisin zańsyz paıdalaný) qylmystyq is qozǵaldy. Tergeý amaldary júrgizilgennen keıin is sotqa joldanady.
