iPhone-ǵa toly chemodan: Astana áýejaıynda jolaýshy 223 smartfon alyp ótpek bolǵan

Astana qalasy boıynsha Memlekettik kirister departamentiniń «Áýejaı — Astana» keden beketiniń qyzmetkerleri mobıldi qurylǵylardy zańsyz ákelýdiń 10 faktisiniń jolyn kesti. Barlyǵy 223 iPhone 18 smartfony jáne 10 AirPods symsyz qulaqqaby anyqtaldy.

— Kedendik baqylaý barysynda jolaýshylardyń bagajynda kóp mólsherde mobıldi qurylǵylardy «jasyl dáliz» arqyly, ıaǵnı kedendik deklaratsııany usynbastan alyp ótkeni anyqtaldy. Atap aıtqanda, bir jaǵdaıda jolaýshy bagajynda birden 50 smartfondy ákelýge áreket jasaǵan. Bul jeke tulǵanyń kedendik tólemderdi tólemeı jáne deklaratsııalamaı, jeke paıdalanýǵa arnalǵan taýar retinde alyp ótýine belgilengen mólsherden edáýir asyp túsedi. Anyqtalǵan faktiler boıynsha 4 tulǵanyń jeke kásipker mártebesi bolǵany, taǵy 4 tulǵanyń jeke kásipker retinde tirkelmeı taýar ákelgeni anyqtaldy, — deıdi departament mamandary.

Memlekettik kirister komıteti taýarlardy kedendik shekara arqyly ótkizý kezinde zańnamada belgilengen jeke paıdalanýǵa arnalǵan taýarlarǵa qatysty ólshemsharttardy eskerý qajettigin eske salady. Uıaly telefondarǵa qatysty jeke tulǵalarǵa bir adamǵa 2 smartfonnan artyq emes mólsherde alyp ótýge ruqsat etiledi.

— Eger ótkiziletin taýarlardyń sany nemese sıpaty jeke paıdalanýǵa arnalǵan taýarlarǵa belgilengen ólshemsharttarǵa sáıkes kelmese, olar kedendik deklaratsııalaýǵa jáne tıisti kedendik rásimdeýge jatady. Anyqtalǵan mobıldi qurylǵylar ýaqytsha saqtaý qoımasyna ornalastyryldy. Anyqtalǵan faktiler boıynsha zańnamada kózdelgen ákimshilik jaýapkershilik sharalary qabyldanyp jatyr, — dedi olar.

Tıisti talaptar «Qazaqstan Respýblıkasy Qarjy mınıstriniń 2015 jylǵy 31 naýryzdaǵy № 250 buıryǵy — jeke tulǵalar ótkizetin taýarlardy Keden odaǵynyń kedendik shekarasy arqyly jeke paıdalanýǵa arnalǵan taýarlarǵa jatqyzý krıterııleri» buıryǵymen belgilengen.

Buǵan deıin Apple iPhone 18 Pro smartfondaryn tanystyrǵanyn jazǵanbyz.