iPhone 18-ge qatysty jańa alaıaqtyq shema paıda boldy
ASTANA. KAZINFORM — Bas prokýratýranyń Quqyqtyq statıstıka jáne arnaıy esepke alý jónindegi komıteti iPhone 18 smartfonyna aldyn ala tapsyrys berýdi syltaýratyp, azamattardy aldaýǵa baǵyttalǵan jańa alaıaqtyq shemalar týraly eskertti.
Qylmystyq qaýip-qaterler men qoǵamdyq qaýipsizdik táýekelderin boljaý ortalyǵynyń málimetinshe, alaıaqtar jańa smartfonǵa degen qyzyǵýshylyqty paıdalanyp, azamattarǵa jalǵan habarlamalar men usynystar jibere bastady.
Alaıaqtyq shema qalaı jumys isteıdi?
Bir jaǵdaıda alaıaqtar Apple kompanııasynyń atynan azamatqa iPhone 18-ge aldyn ala tapsyrys berilgeni týraly jalǵan habarlama jiberedi. Odan bas tartý úshin kórsetilgen «qoldaý qyzmetine» qońyraý shalýdy usynady.
Alaıda habarlamadaǵy nómir alaıaqtarǵa tıesili bolýy múmkin. Olar tapsyrystan bas tartý syltaýymen bank derekteri, qupııa sózder jáne basqa da jeke aqparatty surap, adamdy belgili bir áreketterdi jasaýǵa kóndirýge tyrysady.
Ekinshi jaǵdaıda azamattarǵa iPhone 18 smartfonyn tıimdi baǵamen brondaý jáne jyldam jetkizý usynylady. Tapsyrys rásimdeýge arnalǵan silteme jalǵan saıtqa baǵyttaıdy. Onda bank kartasynyń derekteri, qupııa sózder jáne basqa da qupııa aqparat suralady.
Mundaı málimetter keıin eseptik jazbalar men banktik servısterge kirý nemese aqsha urlaý úshin paıdalanylýy múmkin.
— Alaıaqtardyń negizgi tásili — adamdy asyǵys sheshim qabyldaýǵa ıtermeleý. Kútpegen tapsyrystan qorqý nemese tıimdi usynysty jiberip alýdan qaýiptený azamattyń saqtyq sharalaryn umytýyna ákelýi múmkin, — deıdi mamandar.
Quqyq qorǵaý organdary alaıaqtardan saqtaný úshin:
- kúmándi habarlamalardaǵy siltemelerge ótpeýge jáne kórsetilgen nómirlerge qońyraý shalmaýǵa;
- qupııa sózderdi, PIN-kodtardy, bank kartasynyń CVV-kodyn jáne SMS arqyly kelgen rastaý kodtaryn eshkimge bermeýge;
- beıtanys adamdardyń ótinishi boıynsha qosymsha ornatpaýǵa jáne qurylǵyǵa qashyqtan kirýge ruqsat bermeýge;
- saıttyń túpnusqalyǵyna jáne satýshynyń senimdiligine kóz jetkizbeı turyp aldyn ala tólem jasamaýǵa;
- tapsyrys týraly aqparatty satýshynyń resmı saıty nemese qosymshasy arqyly óz betinshe tekserýge keńes beredi.
Eger bank kartasynyń derekteri alaıaqtarǵa berilip qoısa nemese kúmándi aqsha esepten shyǵarylǵany baıqalsa, dereý bankke habarlasyp, kartany buǵattaý qajet. Sondaı-aq polıtsııaǵa aryz bergen jón.
Mamandar kútpegen tapsyrys týraly habarlamany birden áreket etýge emes, aqparatty tekserýge sebep dep qabyldaýǵa shaqyrady. Al kodty shuǵyl habarlaýdy nemese aqsha aýdarýdy talap etý — alaıaqtyqtyń belgisi bolýy múmkin.
Osyǵan deıin Astana áýejaıynda jolaýshylar 223 iPhone-dy kedennen jasyryn ótkizbek bolǵanyn jazǵanbyz.
