iPhone 17 OpenAI-dyń «mıymen» shyǵýy múmkin: Apple GPT-5 arqyly tehnologııalyq serpilis jasamaq
ASTANA. KAZINFORM — Qyrkúıekte josparlanǵan iPhone 17 jelisiniń tanystyrylymynan keıin Apple kompanııasy iOS 26, iPadOS 26 jáne macOS Tahoe 26 júıeleriniń sońǵy nusqalaryn shyǵarýdy josparlap otyr, dep jazdy Azertadj.
Bul jańartýmen birge Apple qurylǵylaryna OpenAI kompanııasynyń eń jańa GPT-5 neırojúıesi Apple Intelligence qyzmetine biriktirilip engizilýi múmkin.
Insaıderlerdiń habarlaýynsha, Apple GPT-5-ti resýrsty kóp qajet etetin jáne jergilikti modelder oryndaı almaıtyn kúrdeli tapsyrmalardy sheshý úshin paıdalanbaq. Osylaısha, kompanııa GPT-4o modelinen bas tartyp, Siri men basqa da servısterdiń múmkindikterin aıtarlyqtaı jaqsartýdy kózdeıdi.
AZERTADJ sheteldik BAQ-qa silteme jasaı otyryp habarlaǵandaı, qazirgi kezde Apple Intelligence shekteýli túrde GPT-4o modelin paıdalanyp keledi. Bul fýnktsııany qosqan paıdalanýshylar qujattardyń qysqasha mazmunyn jasaý, mátin jazý, Siri arqyly suraqtarǵa jaýap alý jáne kamera kómegimen nysandardy taný sııaqty áreketterdi oryndaı alady.
GPT-5 ıntegratsııasy qupııalylyqtyń joǵary standarttaryn saqtaı otyryp júzege asyrylady dep kútilýde. ChatGPT arqyly suranys jiberetin paıdalanýshylardyń IP-mekenjaılary jasyryn bolady, al OpenAI bul derekterdi saqtamaıdy. Alaıda OpenAI tirkelgisin Apple Intelligence júıesimen baılanystyratyn paıdalanýshylar keńeıtilgen múmkindikterge qol jetkizedi, degenmen bul jaǵdaıda OpenAI-dyń derekterdi óńdeý erejeleri qoldanylatyn bolady.
OpenAI tek GPT-5 flagmandyq modelin ǵana emes, sonymen qatar ashyq bastapqy kodtaǵy eki úlken tildik modeldi de tanystyrdy. Olardyń biri Apple Silicon negizindegi Mac qurylǵylaryna ońtaılandyrylǵan. Apple bul modelderdiń qoldaýyn resmı túrde rastaǵan joq, biraq bul bolashaqta qurylǵylarda jasandy ıntellekt avtonomdy jumys isteı alatynynyń belgisi bolýy múmkin.
Qyrkúıektegi jańartýdan keıin paıdalanýshylar GPT-5 qana emes, sonymen birge Apple Intelligence júıesiniń jańa fýnktsııalaryn da paıdalana alady. Mysaly, Live Translation FaceTime, Habarlamalar jáne qońyraý kezinde sóıleýdi naqty ýaqytta aýdara alady. Visual Intelligence ekrandaǵy kontentti tanyp, ártúrli qosymshalarda onymen árekettesýge múmkindik beredi.
GPT-5 modelin paıdalaný úshin paıdalanýshylar iPhone qurylǵysyna ChatGPT-ke qoljetimdilikti qolmen berýleri qajet bolady.
Eske sala keteıik, buǵan deıin Apple kompanııasy iPhone óndirisin Qytaıdan Úndistanǵa shuǵyl kóshirip jatqanyn jazǵan edik. AQSh prezıdenti Donald Tramptyń aqpanda jarııalaǵan «teńestirilgen keden salyǵy» bastamasynan keıin, Úndistannan AQSh-qa iPhone jetkizilimi aıtarlyqtaı jyldamdaǵan.