IPAF forýmy: strestik aktıvterdi basqarý júıesinde ne ózgerdi
ASTANA. KAZINFORM — Problemalyq kredıtter deńgeıin tómendetýge baǵyttalǵan zamanaýı naryq tetikteri qalyptastyryldy. Bul týraly Memlekettik aktıvterdi basqarý kompanııalarynyń halyqaralyq forýmynyń (IPAF) 10-shy sammıtinde Qarjy vıtse-mınıstri Dáýren Temirbekov málim etti.
Aıta keteıik, is-sharany QR Qarjy mınıstrligi, «Problemalyq kredıtter qory» AQ jáne Azııa damý banki birlesip uıymdastyryp otyr.
— Qazaqstan úshin IPAF-tyń mereıli onynshy konferentsııasyn ótkizý — úlken mártebe ǵana emes, sonymen qatar úlken jaýapkershilik. Qordyń IPAF-tyń tolyqqandy múshesi mártebesin alýy jáne Qazaqstannyń forýmǵa tóraǵalyq etýi elimizdiń strestik aktıvterdi basqarý salasyndaǵy jınaqtalǵan tájirıbesin moıyndalǵanyn kórsetedi. Qazaqstannyń IPAF-qa búgingi tóraǵalyǵy ózara is-qımyldyń jańa kezeńin ashady jáne tájirıbe almasý, óńirlik yntymaqtastyqty damytý jáne úzdik halyqaralyq tájirıbelerdi ilgeriletý úshin qosymsha múmkindikter jasaıdy, — dedi Dáýren Temirbekov.
Onyń aıtýynsha, strestik aktıvterdi tıimdi basqarý máselesi qarjylyq turaqtylyqty qamtamasyz etý salasyndaǵy memlekettik saıasattyń mańyzdy baǵyttarynyń biri bolyp qala beredi. Sońǵy jyldary Qazaqstannyń qarjy retteýshisi strestik aktıvterdiń tolyqqandy naryǵyn damytý boıynsha sharalardy júıeli túrde iske asyryp keledi. Eýropa qaıta qurý jáne damý bankiniń qoldaýymen problemalyq kredıtter deńgeıin tómendetýge jáne olarmen jumys isteýdiń tıimdiligin arttyrýǵa baǵyttalǵan zamanaýı naryq tetikteri qalyptastyryldy.
— 2022 jyldan bastap Qazaqstannyń zańnamasy strestik aktıvterdi jeke, onyń ishinde sheteldik ınvestorlardyń satyp alýyna múmkindik beredi. Sonymen qatar naryqqa qatysýshylar úshin teń salyq jaǵdaılary jasalyp, strestik aktıvterdiń bankter men mamandandyrylǵan uıymdardyń balansynda bolý merzimi úsh jylǵa deıin qysqartyldy, sondaı-aq strestik aktıvterdiń básekelestik naryǵyn damytý úshin qajetti jaǵdaılar jasaldy. Problemalyq kredıtterdi jáne bankterdiń óndirip alynǵan múlkin iske asyrý jónindegi tsıfrlyq platformalardy engizý reformalardyń mańyzdy kezeńine aınaldy. Problemalyq kredıtter qorynyń qyzmetine keletin bolsaq, aktıvterdi basqarý jónindegi basqa da memlekettik kompanııalar sııaqty Qor budan buryn júıe quraýshy bankterden satyp alynǵan strestik aktıvtermen júıeli jumysty jalǵastyryp keledi. 2025 jyldyń qorytyndysy boıynsha aktıvterdi ekonomıkalyq aınalymǵa tartýdan túsken túsim kólemi 36 mlrd teńge boldy, — dedi vıtse-mınıstr.
Onyń sózine qaraǵanda, bereshekti qaıta qurylymdaý, jeke ınvestıtsııalardy tartý jáne bıznestiń turaqtylyǵyn qalpyna keltirý arqyly qaryz alýshylardy qarjylyq saýyqtyrý negizgi basymdyq bolyp qala beredi.
— Sonymen birge, Qor memleketke salynǵan qarajatty aqshalaı nysanda da, strategııalyq jáne áleýmettik mańyzy bar múlikti berý arqyly da qaıtara otyryp, bereshekti óndirip alýdy qamtamasyz etedi. Tek 2025 jyly memleket paıdasyna Ulttyq qorǵa aýdarymdardy jáne dıvıdendter tóleýdi qosa alǵanda, 27 mlrd teńge, al barlyq kezeń ishinde shamamen 260 mlrd teńge baǵyttaldy. Biz strestik aktıvterdi basqarý júıesin odan ári jetildirýdi, qarajatty qaıtarý jáne múlikti ekonomıkalyq aınalymǵa tartý tetikteriniń tıimdiligin arttyrýdy kózdep otyrmyz, — dedi Dáýren Temirbekov.
Aıta keteıik, 12 tamyzda Memlekettik aktıvterdi basqarý kompanııalarynyń halyqaralyq forýmynyń (IPAF) 10-shy sammıtinde Premer-mınıstrdiń orynbasary — Ulttyq ekonomıka mınıstri Serik Jumanǵarın Qazaqstan halyqaralyq qarjy ınstıtýttarymen yntymaqtastyqtyń berik júıesin qalyptastyrǵanyn málim etti.
