Iosıf Kobzon «Qazaqstan» kontsert zalynda án salady
ASTANA. 24 jeltoqsan. QazAqparat - Búgin «Qazaqstan» Ortalyq kontsert zalynda KSRO Halyq ártisi Iosıf Kobzonnyń qatysýymen, «Men saǵan ǵashyqpyn, ómir» atty mereıtoılyq kontsertine arnalǵan baspasóz máslıhaty ótkizildi, dep habarlaıdy elordanyń resmı saıty.
«Men Qazaqstandy jaqsy kóretinimdi jasyrmaımyn. Men sizderdiń elderińdi 1956 jyly Keńes Armııasy qataryna Qostanaı oblysyna bitik shyqqan egindi jınaýǵa áskerge shaqyrǵan kezden bastap jaqsy kórip kettim», - dep aǵynan jaryldy Iosıf Davydovıch.
Sol kezdiń ózinde Kobzon Qazaqstannyń toleranttylyǵyna basa nazar aýdara bastaǵan. «Ol kezde Keńestik Respýblıka bolatyn. Barlyq halyqqa qushaǵyn aıqara ashyp, qonaqjaılyq tanytty. Kóptegen ulttar men ulystar qazaq elinen pana tapty. Men ártis bolǵaly Tselınogradqa jıi kelip júrdim. Al Astana bolǵaly jyl saıyn kelemin», - deıdi ol.
Iosıf Kobzon: «Buryn ándi jurttyń bári jattap alyp, halyq bolyp aıtatyn. Qazir ondaı azaıyp bara jatyr. Degenmen, Qazaqstan óziniń ulttyq mýzykasy men ulttyq shyǵarmashylyǵyn saqtaǵan, efırden jıi beredi», - dep atap ótti.
Astanada ótetin Iosıf Kobzonnyń «Men saǵan ǵashyqpyn, ómir» kontserti onyń gastroldyq qoshtasý sapary aıasynda 75 jyldyq mereıtoıyna arnalǵan. Mereıtoılyq mýzykalyq kesh «Qazaqstan» Ortalyq kontsert zalynda ótedi.
«Biz ІІM akademııalyq án, bı ansamblin alyp keldik. Kontserttik baǵdarlamamyz da úlken. 54 jyl boıy aıtqan ánderimnen popýrrıler oryndalady. Sondaı-aq, syılyq retinde Nursultan Nazarbaevtyń sózine jazylǵan Tólegen Muhamedjanovtyń áni «Meniń qalamdy» oryndaımyn», - dedi ártis.
