Iordannyń Batys jaǵalaýynyń turǵyndary Abbasty saılaýǵa qatysýǵa shaqyrýda
ASTANA. Qarashanyń 9-y. QazAqparat - Jeksenbi kúni Iordan ózeniniń Batys jaǵalaýynyń myńdaǵan turǵyndary qala kóshelerine shyǵyp, Mahmud Abbasty Palestına ulttyq ákimshiliginiń basshylyǵyna óz kandıdatýrasyn qaıta usynýǵa shaqyrdy,
dep habarlaıdy ITAR-TASS agenttigi.
Ulttyq jalaýlardy ustap shyqqan Abbastyń jaqtaýshylary
palestınalyqtar táýelsiz memlekettiń negizin qalaýdy nıet etip otyrǵan Batys jaǵalaýdaǵy eldi-mekenderdi aralap júrgen óz jetekshilerin qarsy aldy.
Abbas jetekshilik etetin FATH qozǵalysynyń úndeýi boıynsha Hevron qalasynda mıtıngke jınalǵan myńdaǵan adamdar da Mahmud Abbasty Palestına avtonomııasynyń basshylyǵynan ketpeýge shaqyryp otyr.
Avtonomııa basshysy ótken beısenbi kúni málimdeme jasap, jańa prezıdenttik merzimge kandıdatýrasyn usynbaıtynyn jarııa etken edi. Bul sheshimin ol, Izraılmen aradaǵy beıbit kelisimde ilgerileýshiliktiń joqtyǵymen, sondaı-aq Kaır uıytqy bolyp otyrǵan palestınaralyq dıalogtyń nátıjesizdigimen jáne avtonomııada birlikti qalyptastyrý jónindegi mysyrlyq bastamany HAMAS-tyń qabyldaýdan bas tartýymen negizdep otyr.
Qazan aıynyń sońynda Mahmud Abbas Iordan ózeniniń Batys jaǵalaýynda, Gaza sektory men Shyǵys Ierýsalımde 2010 jyly qańtardyń 24-inde prezıdenttik jáne parlamenttik saılaý ótkizý týraly jarlyq shyǵarǵan bolatyn. Mysyr uıytqy bolǵan FATH pen HAMAS qozǵalystarynyń arasyndaǵy beıbit dıalog tyǵyryqqa tirelgennen keıin, osyndaı sheshim qabyldanǵan edi.
