Iordanııanyń áskerı-áýe kúshteri Gazaǵa jedel medıtsınalyq kómekti parashıýtpen túsirdi
Iordanııanyń áskerı-áýe kúshteri Gaza sektoryna Palestına anklavynda jumys isteıtin Iordanııa dalalyq gospıtaline arnalǵan medıtsınalyq kómek jetkizdi. Bul týraly Iordanııa Koroli ІІ Abdalla H áleýmettik jelisindegi paraqshasynda habarlady, dep jazady Kazinform agenttigi.
Iordanııalyq patshanyń aıtýynsha, desant túsirý tún ortasy shamasynda júrgizilgen, bul rette jedel medıtsınalyq kómek Gaza sektoryndaǵy ıordanııalyq dalalyq aýrýhanaǵa túsirilgen.
«Bizdiń áskerı-áýe kúshterimiz tún ortasynda Gaza sektoryndaǵy Iordanııa dalalyq aýrýhanasyna jedel medıtsınalyq kómekti tikushaqpen jetkizdi. Gazadaǵy soǵysta zardap shekken palestınalyq baýyrlarymyzǵa kómektesý - bizdiń mindetimiz. Biz árqashan palestınalyq baýyrlarymyzdyń janynda bolamyz», - dedi Iordanııa Koroli ІІ Abdalla.
Izraıl áskeri Gaza sektoryna medıtsınalyq kómek jetkizýdi Iordanııamen «úılestirgenin» málimdedi.
Iordanııanyń Gazaǵa dári-dármek jetkizý máselesi AQSh jáne Izraılmen kelisildi, dep habarlaıdy The Times of Israel amerıkalyq sheneýnikke silteme jasap.
Desant túsirýdi Iordanııanyń Koroldik Áskerı-áýe kúshteri júzege asyrdy. Buǵan Gaza sektoryna Rafah baqylaý-ótkizý pýnkti arqyly kómek jetkizýdiń keshigýine baılanysty Gazadaǵy ıordanııalyq dalalyq gospıtalda qajetti zattar taýsylýy sebep bolǵan, dep habarlady Iordanııa armııasynan.
Iordanııa Qarýly Kúshteriniń habarlaýynsha, gospıtal dári-dármektiń tapshylyǵyna qaramastan óz jumysyn jalǵastyryp, Gaza sektoryndaǵy adamdardyń qaıǵy-qasiretin jeńildetýdegi óziniń gýmanıtarlyq rólin atqaryp keledi.
Gaza sektoryndaǵy Iordanııa dalalyq aýrýhanasy 2009 jyly qurylǵan jáne Iordanııa armııasynyń quzyrynda. Medıtsınalyq mekeme táýligine 1000-1200 adamǵa tegin qyzmet kórsetedi. Birneshe apta buryn Izraıldiń tóńirektegi aýdandardy bombalaýy, sondaı-aq oǵan aparatyn joldardy jaýyp tastaýy saldarynan gospıtaldiń jumys istemeı qalǵany týraly habarlanǵan.
Basqa arab elderi sııaqty Iordanııa da Izraıldiń Gaza sektoryn bombalaýyn aıyptap otyr. HAMAS basqaratyn anklavtaǵy sheneýnikterdiń aıtýynsha, bombalaý saldarynan kem degende 9 922 palestınalyq qaza tapqan.
Ótken aptada Amman Izraıldi «buryn-sońdy bolmaǵan gýmanıtarlyq apat jasady» dep aıyptap, Izraıldegi elshisin keri shaqyrdy.
