Iordanııalyq jýrnalıst QazAqparattyń sarapshysy atandy
ASTANA. QazAqparat - Iordanııanyń «Petra» aqparat agenttiginiń jýrnalısi Mashhýr Abý Eıd «QazAqparat» halyqaralyq aqparat agenttiginiń sarapshylar klýbynyń quramyna endi, dep habarlaıdy QazAqparat.
Sáıkes sertıfıkatty ıordanııalyq jýrnalıske «QazAqparat» HAA bas dırektory Asqar Omarov tabystady.
«Biz úshin Taıaý Shyǵys pen Iordanııa boıynsha jedel-saraptamalyq maǵlumattar berip otyrý óte mańyzdy. Bul sertıfıkat doktor Mashhýr Mýstafa Mýhammad Abý Eıdtiń «QazAqparat» HAA sarapshysy ekenin resmı túrde rastaıdy», - dedi Asqar Omarov.
Jýrnalıstiń aıtýynsha, «Petra» aqparat agenttigi Iordanııa úkimetiniń pozıtsııasyn kórsetedi, negizinen elde jáne shet memleketterde bolǵan saıası oqıǵalar týraly jazady. Qazaqstan týraly aıtqanda, jýrnalıst elimiz ben Nursultan Nazarbaev júrgizip otyrǵan saıasat týraly oń pikir bildirdi.
«Qazaqstan men onyń Prezıdenti Nursultan Nazarbaevtyń bastamalarynyń ilgerileýi álemdik geosaıasatta mańyzdy ról oınady. Dál osy Qazaqstanda ekonomıkalyq jáne áleýmettik damýda qaryshty qadamdardy kórip otyrmyz. Bul úlken mánge ıe», - dedi Mashhýr Abý Eıd.
Iordanııalyq jýrnalıst Astanaǵa «QazAqparat» HAA shaqyrtýymen «EKSPO-2017» halyqaralyq mamandandyrylǵan kórmesi týraly materıal jazý úshin kelgen. Biraq, issapar barysynda Taıaý Shyǵys máseleleri boıynsha «QazAqparat» HAA sarapshylar quramyna kirý týraly usynys aldy jáne «Petra» basshylyǵy bul usynysty maquldady.
Mashhýr Abý Eıd áskerı taqyryptarǵa jazady jáne ol Irak, Gaza sekildi túrli janjal oshaqtarynda bolǵan. Jyl sońyna deıin Iordanııanyń «Petra» aqparat agenttigi jáne «QazAqparat» halyqaralyq aqparat agenttigi yntymaqtastyq týraly memorandým bekitedi. Memorandým aıasynda aqparat agenttikteri kontent almasady jáne oǵan Mashhýr Abý Eıd tikeleı qatysady.
