Iordanııalyq sarapshy: Bir palataly Parlament basqarý tıimdiligin arttyrady

ASTANA.KAZINFORM – Qazaqstan Prezıdentiniń Joldaýynda belgilengen saıası jańǵyrtý men tsıfrlyq transformatsııa baǵyty Ammanda da talqylanyp jatyr.

Qasym-Jomart Toqaev Parlamentti bir palataly etip qaıta qurýdy, Senatty taratý jóninde bastama kóterdi. Sondaı-aq ol Jasandy ıntellekt mınıstrligin qurýdy jáne Qazaqstandy Eýrazııanyń jetekshi avıatsııalyq habyna aınaldyrý jónindegi strategııalyq maqsatty qýattady. Osy oraıda Jordan Daily bas redaktory Nıdal Zýbeıdı pikir bildirdi.

– Prezıdent Toqaevtyń Parlamentti bir palataly júıege kóshirý týraly bastamasy basqarýdy barynsha tıimdi etýge baǵyttalǵan kóregen qadam dep oılaımyn. 1995 jyly turaqtylyqty qamtamasyz etý úshin qurylǵan Senatty eldiń saıası kemeldigi jaǵdaıynda taratý qısyndy, – dedi Zýbeıdı.

Sarapshynyń aıtýynsha, jyl boıy jalǵasatyn qoǵamdyq talqylaý tsıkli jáne 2027 jyly ótetin referendým azamattardy keńinen tartýǵa múmkindik beredi. Bul ózgerister ulttyq erik-jigerge saı bolýyna jáne 2022 jyldan keıin bastalǵan partııalyq júıeni nyǵaıtýǵa baǵyttalǵan reformalardy damytýǵa jol ashady.

– Keń aýqymdy pikirtalastarǵa mán berý jáne máseleni referendýmǵa shyǵarý – qoǵamdy oryndy túrde qatystyrý ári partııalyq júıeni kúsheıtý qadamy. Bul saıası protsestiń zańdylyǵyn jáne boljamdylyǵyn arttyrady, – dep atap ótti ol.

Zýbeıdı óz sózinde ınstıtýtsıonaldyq ózgeristerdi ekonomıkalyq damýdyń basymdyqtarymen jáne tehnologııalyq kún tártibimen baılanystyrady.

– Mundaı sheshim zańdardy qabyldaý protsesin edáýir jedeldetýi múmkin, ásirese jasandy ıntellekt, ınfraqurylym jáne shaǵyn jáne orta bıznesti qoldaý men atom energetıkasy sııaqty ekonomıkalyq basymdyqtarǵa basa mán berip kele jatqan, tabıǵı resýrstarǵa baı el úshin. Qasym-Jomart Toqaevtyń Senat tóraǵasy bolǵandaǵy tájirıbesi bul bastamaǵa qosymsha senimdilik beredi. Jalpy alǵanda, men muny Qazaqstan úshin ǵalamdyq syn-qaterler jaǵdaıynda zańnamalyq qurylymdy jeńildetýdiń jaqsy múmkindigi dep sanaımyn. Eger pikirtalastar ınklıýzıvti ótse, bul áleýmettik-ekonomıkalyq progresti jedeldetip, óńirlik turaqtylyqty kúsheıte alady. Bul óz kezeginde eldiń bolashaqqa nyq senimmen qaraǵan kóregen kózqarasyn aıqyndaıdy, – dep túıindedi Zýbeıdı.

Aıta keteıik, ázerbaıjandyq sarapshylar Parlamentti bir palataly júıege kóshirý bastamasyn erekshe atap ótti.