Iordanııadaǵy áskerı qoımada joıqyn jarylys boldy
AMMAN. QazAqparat – Búgin tańerteń Iordanııanyń Ez-Zarka qalasynda joıqyn jarylys boldy, dep habarlaıdy QazAqparat eldiń Petra agenttigine silteme jasap.
Iordanııanyń memlekettik aqparat mınıstri Amdjad Adaıle merzimi ótken oq-dári saqtalǵan qoımada jarylys bolǵanyn rastady. Qoıma qarýly kúshterge tıesili. Ol eshkim turmaıtyn jerde ornalasqan.
Tergeýdiń alǵashqy nátıjeleri boıynsha jarylys qysqa tuıyqtalý saldarynan bolýy múmkin.
Sondaı-aq, Bas qolbasshylyqtyń málimetinshe, qazirgi ýaqytta jarylystan zardap shekkender joq.
