Iordanııadaǵy shirkeý mańyndaǵy atystan qaza tapqandar sany segiz adamǵa jetti
ASTANA. KAZINFORM – Iordanııanyń Ál-Karak qalasyndaǵy shirkeýde jerleý rásimine qatysýshylarǵa jasalǵan qarýly shabýyldan qaza tapqandar sany segizge jetti. Taǵy bir zardap shekken adamnyń jaǵdaıy aýyr, dep habarlaıdy Anadolu agenttigi.
Bul týraly Iordanııanyń Densaýlyq saqtaý mınıstri Ibragım ál-Býdýr málimdedi.
Mınıstrdiń aıtýynsha, shabýyl bir kún buryn Ál-Karak provıntsııasyndaǵy Hammýd shirkeýinde jerleý rásimi ótip jatqan kezde bolǵan. Ol zardap shekkenderdiń biriniń jaǵdaıy óte aýyr ekenin naqtylady.
Buǵan deıin Iordanııanyń Qoǵamdyq qaýipsizdik basqarmasynyń bas dırektory, general-maıor Ýbeıdýlla ál-Maaıta jeti adamnyń qaza taýyp, 27 adamnyń aýrýhanaǵa jetkizilgenin habarlaǵan edi.
Shabýyldan keıin Iordanııa koroli II Abdalla kinálilerge qatysty qatań sharalar qoldanylatynyn málimdedi.
– Karakqa qarsy jasalǵan terrorıstik aktige eń qatań jaza sharalarymen jaýap beremiz, – dep jazdy monarh X áleýmettik jelisinde.
Iordanııalyq BAQ-tyń málimetinshe, qarýly úsh adam shirkeý mańynda kólikten túsip, aınalasyna beı-bereket oq atqan.
Shabýyl kezinde shirkeýdiń ishinde jáne syrtynda 150-den astam adam bolǵany habarlandy. Buǵan deıin Iordanııa úkimeti bul oqıǵany terrorıstik qylmys dep baǵalaǵan.
Aıta keteıik, buǵan deıin Iordanııada eski oq-dári jarylyp, bir adam qaza tapqanyn jazdyq.
