Iordanııadaǵy qazaqstandyq stýdentter saılaýǵa qatysýdyń mańyzy týraly aıtty
ASTANA. KAZINFORM — Iordanııada bilim alyp jatqan qazaqstandyq stýdentter Quryltaı saılaýynda daýys berip, Qazaqstannan tys jerde júrse de ózderiniń saılaý quqyǵyn júzege asyrýdy ne sebepti mańyzdy dep sanaıtynyn aıtty, dep habarlaıdy Kazinform agenttiginiń menshikti tilshisi.
Jeksenbi kúni Iordanııada bilim alyp jatqan qazaqstandyq stýdentter Quryltaı saılaýyna qatysý úshin Ammandaǵy Qazaqstan elshiligi janyndaǵy saılaý ýchaskesine bardy.
Daýys bergenderdiń biri — Iordanııaǵa oqýǵa kelgenine bir aıǵa jýyq ýaqyt bolǵan Aqnıet esimdi qyz boldy.
— Meniń esimim — Aqnıet. Iordanııada bilim alyp jatqanyma bir aıǵa jýyqtady. Búgin saılaýǵa kelip, saıası partııalardyń birine daýys berdim. Meniń tańdaýym Qazaqstannyń bolashaǵyna óz úlesin qosady dep úmittenemin, — dedi stýdent.
Saılaýǵa qatysqandardyń arasynda Iordanııadaǵy Islam ǵylymdary ýnıversıtetinde bakalavrıatta bilim alyp jatqan Qazybek Nazyr da bar. Onyń aıtýynsha, saılaýǵa qatysý — azamattyń quqyǵy ǵana emes, jaýapkershiligi de sanalady.
— Quryltaı saılaýy óte mańyzdy oqıǵa dep sanaımyn. Al daýys berýge qatysý — árbir qazaqstandyqtyń el aldyndaǵy mindeti ári jaýapkershiligi. Bul saılaý mańyzdy sheshimderdiń qabyldanýyna jáne bolashaqta elimizde oń ózgeristerdiń júzege asýyna yqpal etedi dep oılaımyn, — dedi Qazybek Nazyr.
Iordanııada túrli mamandyqtar boıynsha jergilikti joǵary oqý oryndarynda bilim alyp jatqan qazaqstandyq stýdentter bar. Ammandaǵy saılaý ýchaskesinde daýys berý múmkindigi olardyń Qazaqstannan tys jerde júrip-aq saılaýǵa qatysýyna múmkindik berdi.
Buǵan deıin Quryltaı saılaýynda Iordanııada, sondaı-aq Taıaý Shyǵys elderinde daýys berý ótip jatqany habarlanǵan.
Qazir Qazaqstanda Quryltaı depýtattaryn saılaý boıynsha daýys berý aıaqtaldy. Jergilikti ýaqyt boıynsha saǵat 20:00-de el aýmaǵyndaǵy saılaý ýchaskeleri jabylyp, komıssııalar daýystardy sanaýǵa kiristi.
20:00-degi jaǵdaı boıynsha Quryltaı depýtattaryn saılaýynda daýys berýshiler tizimine engizilgen 9 mln 350 myńnan astam saılaýshy daýys berdi.
ІІM málimetinshe, birde-bir saılaý ýchaskesinde qoǵamdyq tártipti óreskel buzý faktisi tirkelmedi.
Al Bas prokýratýranyń aqparatyna sáıkes bıýlleten sýretin jelige jarııalaǵan 7 azamatqa aıyppul salyndy.
