Iordanııada túıe jarysy ótti
ASTANA. QazAqparat - Vadı-Ram shólindegi dástúrli saıysqa 240 túıe qatystyryldy, dep habarlaıdy Habar 24 telearnasy.
Bul - el astanasy Ammannan 240 shaqyrym qashyqtyqta ornalasqan jer. Ádette jarys tań ata, kún ysymaı turǵanda bastalady. Túıeler eki jaǵynan qorshalǵan jolmen júgiredi. Al avtokólikke mingen ıeleri qasynda júrip, daýystap dem berip turady. Túıeler mundaı qıqýdy arqasyna ilingen daýys zoraıtqyshtar arqyly estıdi.
Buryn túıelerge balalar minip alyp jarysatyn. Alaıda sońǵy kezde balalardy alamanǵa qatystyrýǵa tyıym salyndy. Túıe jarysy - arab elderiniń eń súıikti ermegi. Oǵan jankúıer bolý úshin búkil Iordanııa jáne ózge de elderden adamdar aǵylyp keledi.
