Iordanııada Telegram buǵattaldy

ASTANA. KAZINFORM — Iordanııa bıligi kıberqylmysqa jáne ekstremıstik mazmundaǵy materıaldardyń taralýyna qarsy kúres aıasynda tsıfrlyq keńistikti baqylaýdy kúsheıtip jatyr, dep habarlaıdy Kazinform agenttiginiń Ammandaǵy menshikti tilshisi.

Iordanııada Telegram buǵattaldy
Foto: Anadoly

Iordanııa Qoǵamdyq qaýipsizdik basqarmasy 16 qarasha, dúısenbi kúni ulttyq qaýipsizdikke tónetin qaterlerge baılanysty el aýmaǵynda Telegram messendjerin buǵattaý týraly sheshim qabyldaǵanyn habarlady.

Basqarma málimetinshe, messendjer ekstremıstik jáne radıkaldy mazmundaǵy materıaldardy taratýǵa, sondaı-aq qorqytý, bopsalaý sekildi kıberqylmystar jasaýǵa paıdalanylǵan.

Alaıda resmı málimdemede Telegram-dy buǵattaý qansha ýaqytqa sozylatyny jáne oǵan qoljetimdilikti qalpyna keltirý sharttary aıtylmaǵan.

Iordanııa Qoǵamdyq qaýipsizdik basqarmasynyń málimetinshe, bul sheshim qoldanystaǵy zańnamaǵa sáıkes qabyldandy. Ol tsıfrlyq qaýipsizdikti nyǵaıtýǵa, paıdalanýshylardy qorǵaýǵa jáne ınternettegi zańsyz áreketterdiń aldyn alýǵa baǵyttalǵan.

Vedomstvo zańsyz mazmundaǵy materıaldardy taratý jáne tsıfrlyq platformalardy ekstremıstik ıdeıalardy nasıhattaý úshin paıdalaný qoǵamdyq jáne ulttyq qaýipsizdikke qater tóndiretinin atap ótti.

Sondaı-aq bılik ókilderi azamattardy áleýmettik jelilerdi paıdalanǵanda saq bolýǵa, kúmándi siltemelerge ótpeýge jáne beıtanys akkaýnttarmen baılanys ornatpaýǵa shaqyrdy. Sondaı-aq anyqtalǵan zańbuzýshylyqtar týraly resmı arnalar arqyly habarlaýdy eskertti.

Budan bólek kámeletke tolmaǵandardyń qaýipsizdigine de erekshe nazar aýdaryldy. Ata-analarǵa balalarynyń áleýmettik jeliler men messendjerlerdi paıdalanýyn qadaǵalap, ondaǵy qaýipterdi túsindirý jáne ata-ana baqylaýynyń qoljetimdi quraldaryn qoldaný usynyldy.

Iordanııa Qoǵamdyq qaýipsizdik basqarmasy tsıfrlyq ortadaǵy qylmystar men zańbuzýshylyqtarǵa qarsy sharalardy jalǵastyratynyn málimdedi.

Koroldik bıliginiń bul sheshimine sońǵy ýaqytta bolǵan lańkestik áreketter de áser etýi múmkin. Qazan aıynda birneshe shabýyldaýshy Qarak provıntsııasyndaǵy shirkeýge oq jaýdyrǵan. Al qarashada Amman qalasynda polıtseıdi pyshaqtap óltirgen.

Eske sala keteıik, buǵan deıin Iordanııa soty shirkeýge shabýyl jasaǵan úsh adamdy ólim jazasyna keskenin habarlaǵan bolatyn.