Iordanııada maımyl sheshegin juqtyrǵan alǵashqy jaǵdaı tirkeldi
ASTANA. KAZINFORM – Iordanııanyń Densaýlyq saqtaý mınıstrligi seısenbi kúni koroldikte maımyl sheshegin juqtyrǵan alǵashqy rastalǵan jaǵdaı týraly habarlady.
Densaýlyq saqtaý mınıstrliginiń epıdemıologııalyq máseleler jónindegi bas hatshysy doktor Raed Shbýldyń aıtýynsha, Iordanııada maımyl shesheginiń alǵashqy jaǵdaıy rastaldy.
Vedomstvonyń málimdemesine sáıkes, dúısenbi kúni zerthanalyq zertteýler 33 jastaǵy sheteldikte vırýstyń baryn rastady. Teri bórtpesi túrinde ınfektsııa belgileri bolǵan. Ol Ammandaǵy ál-Bashır aýrýhanasyna jatqyzylǵanymen, jaǵdaıy turaqty.
Infektsııany juqtyrǵan adamnyń aty-jóni de, azamattyǵy da aıtylmaıdy. Mınıstrlik bul aýrýǵa qatysty kez kelgen oqıǵalardyń tolyq ashyqtyǵyn qamtamasyz etetinin aıtty.
Densaýlyq saqtaý mınıstrliginiń málimetinshe, bul koroldiktegi birinshi jaǵdaı emes: maımyl sheshegin juqtyrýdyń taǵy bir jaǵdaıy 2022 jyly tirkelgen. Sodan keıin ınfektsııanyń taralýyna jol bermeý jáne naýqastyń eshqandaı asqynýsyz saýyǵyp ketýi úshin jetkilikti túrde ádettegi protsedýralar oryndaldy.
Dúnıejúzilik densaýlyq saqtaý uıymy maımyl sheshegin halyqaralyq mańyzy bar densaýlyq saqtaý salasyndaǵy tótenshe jaǵdaı retinde jiktedi. Afrıkanyń onnan astam eli indettiń órshýi týraly habarlady, Kongo Demokratııalyq Respýblıkasyna tirkelgen jaǵdaılardyń 90 paıyzdan astamy tıesili.
Mpox sımptomdaryna qyzba, lımfa túıinderiniń isinýi, bulshyqet aýrýy, sharshaý, qaltyraý, qol men bettegi jelsheshek tárizdi bórtpe jatady. Afrıkada taralatyn shtamm 2022 jyly bastalǵan jahandyq indet týdyrǵan Clade II shtamyna qaraǵanda juqpaly jáne óte qaýipti dep sanalady.
