Iordanııada koronavırýsqa qarsy vaktsınatsııa naýqany qarqyn alýda
AMMAN. QazAqparat – Iordanııada halyqty vaktsınatsııalaý protsesi qarqyn alýda, ony júzege asyrý ulttyq baǵdarlama túrinde qabyldanǵan bolatyn, dep habarlaıdy QazAqparat tilshisi.
Koronavırýsqa qarsy vaktsınany alý úshin ıordanııalyqtar Densaýlyq saqtaý mınıstrliginiń arnaıy saıtynda onlaın tirkeýden ótedi. Elde qabyldanǵan Ulttyq vaktsınatsııa baǵdarlamasyna sáıkes, eń aldymen ekpeni halyqtyń eń osal toptary – egde jastaǵy adamdar, ilespe aýrýlary bar adamdar, sondaı-aq densaýlyq saqtaý salasynyń qyzmetkerleri alady.
Sonymen qatar, aqpan aıynyń basynda densaýlyq saqtaý organdary Sinopharm jáne Pfizer/BioNTech vaktsınalarynyń ekinshi partııasymen el halqyn vaktsınatsııalaýǵa kiristi. Sondaı-aq, seısenbide Iordanııanyń Azyq-túlik jáne dári-dármekterdi baqylaý basqarmasy shuǵyl qoldaný úshin AstraZeneca vaktsınasyn maquldady, bul koroldikte qoldanýǵa ruqsat etilgen úshinshi vaktsına boldy.
Mınıstrliktiń habarlaýynsha, osy aptanyń basynda 45 myńǵa jýyq adam koronavırýsqa qarsy ekpe alǵan. Densaýlyq saqtaý mınıstrliginiń epıdemıologııalyq máseleler jónindegi bas hatshysy Vael Haıadjne koronavırýsqa qarsy vaktsınany almaıtyn halyqtyń toptaryn tizip berdi.
Onyń qatarynda júkti jáne emizetin balasy bar áıelder, sondaı-aq aldaǵy úsh aı ishinde júkti bolýdy josparlap júrgen áıelder bar. Sondaı-aq, demikpege ákelýi múmkin aýyr túrdegi allergııasy bar adamdar koronavırýsqa qarsy ekpe almaıdy.
Avtor: Ársen Ýteshev
