Iordanııada el premeriniń otstavkasy talap etilgen narazylyq sharalary ótti
ASTANA. 15 qańtar. QazAqparat - Iordanııanyń birqatar óńirinde el premeri Samır ar-Rıfaıdyń otstavkasyn talap etken halyqtyń narazylyq sharalary ótti.
Mıtıngterge 8 myńdaı adam qatysty. Manıfestatsııalar eldiń ordasy - Amman qalasynda da ótti. Azyq-túlik pen otyn baǵasynyń qymbattyǵy, jumyssyzdyq deńgeıiniń joǵarylyǵy - halyq narazylyqtarynyń basty sebebi bolyp otyr, dep habarlaıdy RBK agenttigi.
El ókimeti qoǵamdaǵy jaǵdaıdy retteý úshin, birqatar taýarlardyń baǵasyn tómendetý tárizdi sharalar qabyldady, biraq ol áreketter ázirge nátıje bermeı otyr, dep habarlady Press TV telearnasy.
Esterińizge sala keteıik, Týnıste osyndaı sebeptermen bastalǵan buqaralyq sharalar tóńkeriske ákelip, el prezıdenti Zın ál-Abıdın Ben-Álı elden qashýǵa májbúr bolǵan edi. Ýaqytsha bılik el premeri Mohammed Gannýshıdiń qolyna ótti. Oǵan qosa, Týnıspen kórshi Aljır elinde de qańtar aıynyń basynan beri tártipsizdikter men qaqtyǵystar jalǵasyp keledi. Oǵan da azyq-túlik ónimderiniń qymbattyǵy, halyq turmysynyń nasharlaýy sebep bolyp otyr.
