Iordanııada ammıak taralyp, 14 adam zardap shekti
ASTANA. KAZINFORM — Iordanııa bıligi Aqaba qalasyndaǵy ónerkásip nysandarynyń birinde bolǵan ammıaktyń taralý oqıǵasy tolyq oqshaýlanǵanyn habarlady. Bul týraly Kazinform agenttiginiń menshikti tilshisi habarlady.
14 qyrkúıekte Aqaba qalasyndaǵy ónerkásiptik keshende ammıaktyń taralýy saldarynan 14 adam zardap shekti. Bul týraly Iordanııanyń Petra agenttigi provıntsııa gýbernatory Aıman ál-Avaıshanyń málimdemesine silteme jasap habarlady.
Zardap shekken tórt adam aýrýhanaǵa jetkizildi. Qalǵandaryna kásiporyn aýmaǵyndaǵy medıtsınalyq pýnktterde qajetti kómek kórsetildi. «Al-Mamlıaka» telearnasynyń habarlaýynsha, zardap shekkenderde jeńil jáne ortasha deńgeıdegi tunshyǵý belgileri baıqalǵan.
Ammıaktyń taralýy Iordanııanyń Fosfat kenishteri kompanııasyna tıesili ónerkásiptik keshenniń Aqabanyń ońtústigindegi ónerkásiptik aımaǵynda jabdyqtarǵa tehnıkalyq qyzmet kórsetý jumystary kezinde bolǵan.
Aqaba arnaıy ekonomıkalyq aımaǵynyń qorshaǵan orta jáne qoǵamdyq qaýipsizdik jónindegi ókili Nıdal ál-Ýrannyń málimdeýinshe, oqıǵa eski sorǵyǵa nemese qysymmen jumys isteıtin jabdyqqa tehnıkalyq qyzmet kórsetý kezinde bolǵan. Aldyn ala boljam boıynsha, jóndeý jumystary kezinde jabdyqta jınalyp qalǵan az mólsherdegi ammıak syrtqa taraǵan.
Kásiporyn qyzmetkerleri bastapqy qaýipsizdik sharalaryn qabyldaǵan. Alaıda olardyń keıbiri aǵyp ketý ornyna jaqyn bolǵandyqtan, gazdy jutyp, zardap shekken. Mamandar negizgi klapandy jedel jaýyp, ammıaktyń taralýyn toqtatty.
Qaýipsizdik sharasy retinde kásiporyn qyzmetkerleri men jaqyn mańdaǵy birqatar nysandardyń jumysshylary qaýipsiz jerge evakýatsııalandy. Olardyń qatarynda oqıǵa ornyna jaqyn ornalasqan Aqabanyń jańa portynyń qyzmetkerleri de boldy. Alaıda gýbernatordyń aıtýynsha, aýdan boıynsha jappaı evakýatsııa júrgizilgen joq.
Oqıǵa jergilikti ýaqyt boıynsha túski saǵat shamasynda bolǵan. Shamamen eki saǵattan keıin qyzmetkerlerge jumys oryndaryna qaıta oralýǵa ruqsat berildi. Sondaı-aq portta júk tıeý-túsirý jumystary men júk kólikterine qyzmet kórsetý qaıta jalǵasty.
Jergilikti bıliktiń málimetinshe, qazirgi ýaqytta jaǵdaı tolyq baqylaýda. Oqıǵa ornynda júrgizilgen aýa sapasyn tekserý nátıjesinde qorshaǵan ortanyń lastanbaǵany anyqtaldy.
Ammıaktyń taralý sebepterine qatysty tergeýdiń túpkilikti nátıjeleri ázirge jarııalanǵan joq.
Aıta keteıik, Iordanııa Iran ushyrǵan 18 ballıstıkalyq zymyrannyń jolyn kesti.
