Iordanııada 11 qyrkúıekke teńestirilgen lańkestiktiń aldy alyndy
ASTANA. 23 qazan. QazAqparat - Iordanııanyń arnaıy qyzmeti habarlaǵandaı, olar eldiń astanasy Ammanda lańkestik shabýyldardyń josparyn áshkere etti, dep habarlady RBK.
Bul málimetterge qaraǵanda, «Al-Kaıedaǵa» jaqyn qylmyskerler qaladaǵy saýda ortalyqtary men dıplomatııalyq elshilikterde jarylys jasamaq bolǵan.
Uıymdastyrýshylar óz arasynda «11 qyrkúıek» dep ataǵan shabýyl eki kezeńnen turýy ábden múmkin edi. Jankeshtiler aldymen ózderin jaryp jiberý arqyly polıtsııanyń nazaryn ózderine aýdartýdy kózdegen. Sodan keıin Amman qalasynyń batysynda, Abdýnda joıqyn jarylystardy, lańkestikterdi jasaý josparlanǵan.
Iordanııanyń bılik ókilderi málim etkendeı, qylmystyq top 11 adamnan turady. Olardyń barlyǵy qamaýǵa alyndy, tekserý amaldary júrgizilýde.
