Iordanııa táýelsizdiginiń 77 jyldyǵyn toılap jatyr
Táýelsizdik kúni – Iordanııanyń aýqymdy toılanatyn memlekettik merekeleriniń biri.
1918 jylǵa deıin Iordanııa Osman ımperııasynyń quramynda boldy. Ol qulaǵannan keıin Ulybrıtanııa Ulttar lıgasynyń Palestınany Iordan teńiziniń eki jaǵalaýynda da basqarý mandatyn aldy. Bul aımaqtyń ¾ bóligine jýyǵyn Transıordanııa alyp jatty, onyń ámiri 1921 jyly Abdalla bın Hýseın ál Hashımı boldy. 1923 jyly Transıordanııaǵa keń avtonomııa berilgenimen, syrtqy ister, qorǵanys, qarjy máselelerin sol jyldary áli de Ulybrıtanııa sheship otyrdy.
1946 jyldyń 25 mamyrynda Iordanııa parlamenti – Zań shyǵarýshy keńesi London kelisimin ratıfıkatsııalady. Bul Brıtan protektoratynyń bitkenin, jańa táýelsiz memleket bolǵanyn bildirdi. Al qazirgi Iordan Hashımıt Koroldigi ataýyn memleket keıinirek – 1949 jyldyń sáýirinde aldy.
«Sol sátte Iordanııa ınstıtýtsıonalızm, ártúrlilik pen tózimdilikti negizge alǵan memleketke aınaldy», dep habarlady Iordanııalyq Petra agenttigi.
Dástúr boıynsha Ammanda korol otbasy, azamattar men áskerı sheneýnikter qatysatyn parad ótkiziledi. Sondaı-aq mereke qurmetine 21 qarýdan oq atylady.
Iordanııa Koroli Abdalla II bın ál-Hýseın ultyna quttyqtaý joldady.
Bul kún jumys kúnine jatpaıdy, Koroldik turǵyndary demalady. Kúni boıy astana men basqa da qalalarda is-sharalar ótedi.
Iordanııa qazirgi ýaqytta taǵy bir merekeni kútip otyrǵanyn aıta keteıik. Ol – kelesi aptada ótetin murager hanzada Hýseın bın Abdalla II-niń toıy.
