Iordanııa tarapy Qazaqstanda farmatsevtıkalyq fabrıkany salýǵa nıetti
ASTANA. QazAqparat - Iordanııa tarapy Qazaqstanda farmatsevtkalyq fabrıkany salýǵa nıetti. Búgin Astanada Saýda-ekonomıkalyq jáne mádenı-gýmanıtarlyq yntymaqtastyq jónindegi Qazaqstan-Iordanııa Úkimetaralyq komıssııanyń tórtinshi otyrysynan keıin QR Aýyl sharýashylyǵy vıtse-mınıstri Ermek Kósherbaev osylaı málim etti.
Eki eldiń arasyndaǵy saýda kólemi áleýetin arttyrý múmkindigin tolyqtaı paıdalaný kerektigine toqtalǵan ol, Elbasynyń Iordanııaǵa aldaǵy sapary qarsańynda komıssııa jumysynda birlesip isteıtin baǵyttar tyńǵylyqty qaralǵanyn jetkizdi.
«Iordanııalyq tarap farmatsevtıka salasyndaǵy yntymaqtastyqty damytýǵa qyzyǵýshylyq tanytyp otyr, ıaǵnı osynda farmatsevtıkalyq fabrıkany salýǵa nıetti. Ol úshin tirkeý men sertıfıkattaýǵa qatysty tıisti rásimnen ótý kerek. Iordanııa jaǵy Qazaqstandy Eýrazııalyq ekonomıkalyq odaqtyń naryǵyna shyǵatyn jol retinde kórip otyr. Sonymen qatar veterınarlyq preparattar óndirisine de qyzyǵýshylyq bildirýde»,-dedi E. Kósherbaev.
Onyń sózine qaraǵanda, Iordanııa shet elderden aýqymdy kólemde aýyl sharýashylyǵy ónimderin ımporttaýda. Talqylaýlar barysynda ıordanııalyqtar Qazaqstan astyǵyn alýǵa nıet tanytyp otyr. Olar jaqynda teńiz portynda erkin ekonomıkalyq aımaqty qurdy jáne astyq habyn qalyptastyrýda ekonomıkalyq aımaqtar jumysyna qatysýǵa qazaqstandyq kompanııalardy shaqyrýda.
