Iordanııa soty shirkeýge shabýyl jasaǵan úsh adamdy ólim jazasyna kesti
ASTANA. KAZINFORM — Iordanııa Memlekettik qaýipsizdik soty shirkeýge qarýly shabýyl jasap, toǵyz adamnyń ómirin qıǵan úsh er adamdy ólim jazasyna kesti, dep habarlaıdy Kazinform Anadolu agenttigine silteme jasap.
Sot úkimi 15 qarashada shyqty. Aıyptalýshylar terrorıstik áreketterge barǵany, qarý qoldaný arqyly terakt uıymdastyrýǵa sóz baılasqany jáne terrorıstik toptyń ıdeologııasyn taratqany úshin kináli dep tanyldy. Sondaı-aq olardyń birine terrorızmdi qarjylandyrý aıyby da taǵyldy.
Eske sala keteıik, 23 qazanda eldiń batysyndaǵy Karak qalasyndaǵy shirkeýde jerleý rásimi kezinde qarýly shabýyl jasaldy. Qarýly qaqtyǵystan toǵyz adam qaza taýyp, taǵy 34 adam jaraqat aldy.
Iordanııa Qoǵamdyq qaýipsizdik basqarmasynyń málimetinshe, kúdiktiler 26 qazanda birlesken izdestirý operatsııasy kezinde ustalǵan.
Quqyq qorǵaý organdarynyń qyzmetkerleri kúdiktilerdi qaraýsyz qalǵan úıden tapqan. Ustaý kezinde olar berilýden bas tartyp, oq jaýdyrǵan.
Operatsııa barysynda úsheýi de jaraqat alǵan kúıde qolǵa tústi. Oqıǵa ornynan atys qarýy men oq-dáriler tárkilendi.
Buǵan deıin Iordanııa koroli ІІ Abdallanyń taqta sóılegen sózinde Karaktaǵy terakt pen aımaqtaǵy kúrdeli jaǵdaıdy sóz etkeni habarlanǵan bolatyn.