Iordanııa patshasy Izraıl shabýyldaryna qarsy arab álemin birigýge shaqyrdy

ASTANA. KAZINFORM — Amman Izraıldiń Qatarǵa jasaǵan shabýylyna jaýap retinde dıplomatııalyq kúsh-jigerin kúsheıtip jatyr, dep habarlaıdy Kazinform agenttiginiń menshikti tilshisi.

Iordanııa patshasy Abdalla II Qatar emıri sheıh Tamım bın Hamad Ál Tanıimen telefon arqyly sóılesip, Qatardyń qaýipsizdigi Iordanııanyń qaýipsizdiginiń ajyramas bóligi ekenin atap ótti. Ol Izraıldiń Dohaǵa jasaǵan «jigersiz agressııasyn» qatty aıyptap, bul áreketti halyqaralyq quqyq normalaryn buzý dep atady.

— Qatardyń qaýipsizdigi — Iordanııanyń qaýipsizdigi. Biz sheıh Tamımniń basshylyǵyndaǵy baýyrlarymyzdy tolyq qoldaımyz jáne arab elderiniń egemendigine qastandyq jasaıtyn kez kelgen áreketterge qarsy turamyz, — dedi Abdalla II.

يملك جميع الأوسمة ..إلاّ وسام الشرف pic.twitter.com/oIdIyWhpDW

— Khalid خالد 🇵🇸 (@KhalidEl97) September 9, 2025

Patsha arab elderiniń birigý qajettiligin atap, mundaı shabýyldardy tez arada toqtatýǵa baǵyttalǵan halyqaralyq qoǵamdastyqty mobılızatsııalaýǵa shaqyrdy.

Sonymen qatar, Iordanııa patshasy Mysyr prezıdenti Abdelfattah as-Sısımen telefon arqyly sóılesip, Amman men Kaır arab elderiniń qaýipsizdigi men turaqtylyǵyna baǵyttalǵan kez kelgen qaýip-qaterge qarsy «birigip kúresetinin» rastady.

Budan bólek, Saýd Arabııasynyń murager prıntsi Muhammed bın Salmanmen telefon arqyly sóılesý barysynda Abdalla II Izraıldiń aımaqtyq turaqtylyqty buzatyn zańsyz áreketterin toqtatý maqsatynda arab elderiniń kúsh-jigerin kúsheıtip, tıimdi halyqaralyq pozıtsııa qalyptastyrýdyń mańyzdylyǵyn atap ótti.

Esterińizge sala keteıik, seısenbi kúni Izraıl Qatar astanasyndaǵy Palestına uıymy HAMAS-tyń shtab-páterine soqqy bergen bolatyn.

Keıinnen Izraıl Doha shabýyly úshin jaýapkershilikti tolyq óz moınyna aldy.