Iordanııa, Palestına jáne Mysyr Gaza sektoryndaǵy gýmanıtarlyq bitimdi qoldady
Iordanııa, Palestına jáne Mysyr bıligi sársenbi kúni málimdeme jasap, Gaza sektorynda Palestınanyń HAMAS qozǵalysy men Izraıl arasynda sheteldik deldaldyqpen jasalǵan gýmanıtarlyq kelisimdi quptaıtynyn aıtty, dep habarlaıdy Kazinform agenttiginiń tilshisi.
Sársenbi kúni Izraıl men HAMAS kepilge alynǵan 50 adamdy jáne kóptegen palestınalyq tutqyndy bosatýǵa múmkindik beretin kelisimge qol jetkizip, qorshaýdaǵy Gaza turǵyndaryna aptalap jalǵasqan soǵystan keıin tórt kúndik bitim jarııalady.
Iordanııa málimdemesinde bitim Gaza sektoryndaǵy soǵysty toqtatatyn jáne palestınalyqtardyń shabýylǵa ushyrap, óz jerinen kóship ketýine jol bermeıtin qadam bolady dep úmittenetini aıtylǵan.
«Syrtqy ister jáne ekspatrıanttar isteri mınıstrligi baýyrlas Katar memleketiniń Mysyr Arab Respýblıkasymen jáne Amerıka Qurama Shtattarymen seriktestikte jasaǵan kúsh-jigerin joǵary baǵalaı otyryp, Gaza sektoryndaǵy gýmanıtarlyq atysty toqtatý týraly kelisimge ákelgen kúsh-jigerdi quptaıdy», - delingen Iordanııa SІM málimdemesinde.
Iordanııa SІM resmı ókili, Elshi Sýfıan Ál-Kýda Gaza sektorynda atysty toqtatýdyń jalǵasyp jatqan soǵysty tolyǵymen toqtatýǵa baǵyttalǵan qadam retinde mańyzyn atap ótti.
Palestına prezıdenti Mahmýd Abbas ýaqytsha bitimge kelý kelisimin quptap, Izraıl-Palestına arasyndaǵy uzaqqa sozylǵan qaqtyǵysty keńirek sheshýge shaqyrdy.
Iordan ózeniniń batys jaǵalaýynda ornalasqan Abbas ákimshiligi «Katar-Mysyr deldaldyq talpynysyn baǵalaıtynyn» jáne Izraılmen bitimge kelýdiń uzartylýyn jáne «halyqaralyq zańdylyqqa negizdelgen saıası sheshimniń júzege asyrylýyn» qalaıtynyn málim etti. Bul týraly Palestınany azat etý uıymy atqarýshy komıtetiniń bas hatshysy Hýseın Ash-Sheıh habarlady.
Mysyr prezıdenti Ábdel Fattah ál-Sısı kelisimdi quptap, ony Mysyr, Katar jáne Amerıka arasyndaǵy sátti deldaldyq dep atady.
Facebook áleýmettik jelisindegi resmı paraqshasynda jarııalanǵan málimdemede ol Mysyrdyń «ádildik, beıbitshilik pen Palestına halqynyń zańdy quqyqtaryn qamtamasyz etý úshin uzaqmerzimdi jáne turaqty sheshimderge qol jetkizýdegi úzdiksiz kúsh-jigeri» dep atap ótti.
Sondaı-aq Saýd Arabııasy, Mysyr jáne Iordanııa syrtqy ister mınıstrleri Londonda BAQ brıfınginde Izraıl men HAMAS toby arasyndaǵy ýaqytsha bitimge qol jetkizý týraly kelisimdi quptap, ony uzartý kerek ekenin jáne bul soǵys qımyldaryn tolyq toqtaý jolyndaǵy alǵashqy qadam bolýy tıis ekenin málimdedi.
Qazirgi ýaqytta arab elderiniń syrtqy ister mınıstrleri Gaza sektoryndaǵy soǵysty toqtatý jáne Izraıl-Palestına qaqtyǵysyn túpkilikti sheshý maqsatynda Izraıldiń negizgi odaqtastarymen jáne BUU Qaýipsizdik Keńesine múshe eldermen lobbı jasap, kezdesýler júrgizip jatqan negizinen musylman elderiniń baılanys tobyn basqarady, dep jazady Asharq Al-Awsat.
Osylaısha, resmı deńgeıde «Gazadaǵy soǵysty toqtatý úshin halyqaralyq áreketterge jaýapty arab-ıslam mınıstrler komıteti» dep atalatyn atalǵan baılanys toby Qytaı jáne Reseıde boldy. Komıtet músheleri Londonǵa bardy. Búgin olar Ulybrıtanııa Syrtqy ister mınıstri Devıd Kemeronmen kezdesip jatyr.
