Iordanııa Koroliniń resmı sapary kezinde Astanada qaýipsizdik sharalary kúsheıtiledi
ASTANA. KAZINFORM — Prezıdent Qasym-Jomart Toqaevtyń shaqyrýymen 26-27 tamyz kúnderi Qazaqstanǵa Iordanııa Koroli II Abdalla ben ál-Hýseın resmı saparmen keledi.
Osyǵan oraı Qazaqstan Respýblıkasynyń Memlekettik kúzet qyzmeti astanalyqtarǵa habarlandyrý jasady.
— Iordanııa Koroli Abdalla II ben ál-Hýseınniń Qazaqstan Respýblıkasyna resmı sapary kezinde (a.j. 26-27 tamyzda) qalanyń jekelegen kóshelerinde kólik quraldary men jaıaý júrginshilerdiń qozǵalysyna ýaqytsha shekteý engiziledi. Daıyndyq is-sharalary arnaýly memlekettik jáne quqyq qorǵaý organdarynyń, sondaı-aq QR Qarýly Kúshteriniń, onyń ishinde áskerı avıatsııa men tehnıka resýrstaryn paıdalaný arqyly júrgiziledi. Astana qalasynyń turǵyndary men qonaqtarynan halyqaralyq dárejedegi mańyzdy oqıǵa kezinde qaýipsizdikti qamtamasyz etý boıynsha júrgiziletin is-sharalarǵa túsinistikpen qaraýdy suraımyz, — delingen vedomstvo habarlamasynda.
Eske salsaq, Iordanııa Koroliniń Astanaǵa sapary barysynda saýda-ekonomıkalyq jáne mádenı-gýmanıtarlyq salalardaǵy Qazaqstan-Iordanııa yntymaqtastyǵyn odan ári nyǵaıtý maqsatynda joǵary deńgeıdegi kelissózder ótedi.