Iordanııa koroliniń Qazaqstanǵa sapary ekijaqty qarym-qatynastarǵa jańa serpin berdi – sarapshy
ASTANA. KAZINFORM – Iordanııa koroli Abdalla ІІ-niń Qazaqstanǵa jasaǵan resmı sapary ekijaqty baılanystardy tereńdetip, ekonomıkalyq yntymaqtastyqty nyǵaıtýǵa jańa serpin berdi.
Iordanııalyq «Ad-Dýstýr» gazeti bas redaktorynyń orynbasary ári Ekonomıkalyq zertteýler ortalyǵynyń basshysy Aýnı ad-Daýdtyń pikirinshe, bul sapardyń mańyzy zor, sebebi ol 2025 jylǵy aqpanda Prezıdent Qasym-Jomart Toqaevtyń Ammanǵa jasaǵan saparynan keıin qysqa ýaqyt ishinde júzege asty. Ol kezde aýyl sharýashylyǵy, ǵylym, mádenıet, energetıka jáne ınvestıtsııa salalarynda 16-ǵa jýyq kelisim men memorandýmǵa qol qoıylǵan bolatyn.
Ad-Daýd atap ótkendeı, qazirgi sapardyń basty oqıǵasy – Astanada ótken Qazaqstan-Iordanııa kásipkerleriniń bıznes-forým boldy. Forýmǵa eki elden 300-ge jýyq kásipker qatysyp, túrli salalardy qamtyǵan birqatar jańa jobalar talqylandy.
«Bul – saıası dıalogty naqty birlesken jobalarǵa aınaldyrýǵa múmkindik beretin mańyzdy qadam. Qazirdiń ózinde farmatsevtıka ónerkásibi, aýyl sharýashylyǵy, tsıfrlandyrý jáne energetıka salasyndaǵy bastamalar qarastyrylyp jatyr», – dedi sarapshy.
Onyń aıtýynsha, myqty saıası baılanystarǵa qaramastan, ekijaqty saýda aınalymy kútken deńgeıge jete qoıǵan joq: 2024 jyly onyń kólemi 2,9 mln AQSh dollarynan aspaǵan, onyń ishinde 1,3 mln dollaryn ıordanııalyq eksport quraǵan.
«Potentsıal budan áldeqaıda joǵary. Qazaqstan naryǵynyń jyldyq syıymdylyǵy shamamen 2 mlrd AQSh dollaryn quraıtyn farmatsevtıka salasyna ınvestıtsııa salýǵa qolaıly jaǵdaı bar. Iordanııa kompanııalary bul baǵytta tájirıbe jınaqtap úlgerdi jáne biz olardyń jumys aıasyn keńeıtedi dep úmittenemiz», – dedi ad-Daýd.
Sarapshy sondaı-aq aýyl sharýashylyǵyna erekshe kóńil bólinip otyrǵanyn, sonyń ishinde qazaqstandyq bıdaıdy Iordanııaǵa jetkizý, qus sharýashylyǵyn damytý, joǵary bilim, tsıfrlyq tehnologııalar, ıadrolyq energııany beıbit maqsatta paıdalaný jáne Iordanııadaǵy ýran baǵdarlamasyn damytý baǵyttary qarastyrylyp jatqanyn jetkizdi.
«Mańyzdy qadamdardyń biri – 2026 jylǵy maýsymda Amman men Astana arasynda tikeleı áýe qatynasyn ashý bolmaq. Bul saýda men týrızmdi damytýǵa jańa serpin beredi», – dedi ol.
Eske sala keteıik, sársenbi kúni Memleket basshysy Qasym-Jomart Toqaev pen Iordanııa koroli Abdalla ІІ ıordanııalyq monarhtyń Astanaǵa sapary aıasynda ótken Qazaqstan-Iordanııa bıznes-forýmyna qatysty.