Iordanııa Koroli Qazaqstanǵa resmı saparmen kele jatyr
ASTANA. KAZINFORM – Iordanııa Koroli Abdalla II ben ál-Hýseın 26-27 tamyzda Qazaqstanǵa resmı saparmen keledi. Sapar Prezıdent Qasym-Jomart Toqaevtyń shaqyrýymen ótedi jáne eki el arasyndaǵy qarym-qatynasty jańa deńgeıge kóterýdi kózdeıdi, dep habarlaıdy agenttik tilshisi.
Qazaqstan-Iordanııa bıznes-forýmyna 300 kásipker qatysady
Astanada Korol Abdalla II ben ál-Hýseın Prezıdent Qasym-Jomart Toqaevpen kelissózder ótkizedi.
Sapardyń basty maqsaty – jan-jaqty áriptestikti nyǵaıtý, saıası dıalogty keńeıtý jáne 2025 jylǵy aqpanda Memleket basshysynyń Ammanǵa sapary barysynda qol jetkizilgen ýaǵdalastyqtardy naqty jobalarmen tolyqtyrý.
Kelissózderde saýda-ekonomıkalyq yntymaqtastyq, ınvestıtsııalar, energetıka, aýyl sharýashylyǵy men azyq-túlik qaýipsizdigi, farmatsevtıka, IT jáne tsıfrlandyrý, kólik logıstıkasy, týrızm, sondaı-aq gýmanıtarlyq jáne bilim berý máseleleri talqylanady.
Sonymen birge taraptar halyqaralyq jáne óńirlik qaýipsizdikti, onyń ishinde Taıaý Shyǵystaǵy ahýaldy retteý jáne halyqaralyq uıymdar aıasyndaǵy ózara is-qımyl sharalaryn qarastyrady.
Sapardyń basty sharalarynyń biri – shamamen 300 kásipker men ınvestor qatysatyn Qazaqstan-Iordanııa bıznes-forýmy bolady. Forým jumysyna memleket basshylary da qatysady dep kútilýde.
Aqpandaǵy kelisimderdiń jalǵasy
Prezıdent Qasym-Jomart Toqaevtyń 2025 jylǵy aqpanda Iordanııaǵa jasaǵan sapary qazirgi kezdesýdiń irgetasy boldy. Sol kezde taraptar ekonomıkalyq baılanystardy keńeıtý, saýda jáne ınvestıtsııa úshin jańa jaǵdaılar jasaý, birqatar birlesken jobalardy iske qosý týraly ýaǵdalasqan bolatyn.
Iordanııanyń Qazaqstandaǵy Elshiligi atap ótkendeı, sol kezdegi kelisimder búgin naqty bastamalarǵa ulasty.
«Memleket basshylarynyń saparlary eki eldiń yntymaqtastyqty tereńdetýge jáne birlesken jobalarǵa qolaıly jaǵdaı jasaýǵa ázir ekenin kórsetti», – delingen Elshilik málimdemesinde.
Birlesken jobalar - berekeli ister
Agro salada QR Aýyl sharýashylyǵy mınıstrligi men Iordanııanyń Ónerkásip jáne saýda mınıstrligi arasynda qazaqstandyq bıdaıdy jetkizý boıynsha jumys toby quryldy. Negizgi jetkizýshi retinde «Prodkorporatsııa» qarastyrylyp otyr.
Sonymen qatar, ıordanııalyq Aljazeera Agricultural kompanııasy QR Aýyl sharýashylyǵy mınıstrligimen Qazaqstanda asyl tuqymdy qus ósirý zaýytyn salý jobasy boıynsha memorandýmǵa qol qoıýǵa daıyndalýda.
Farmatsevtıka jáne medıtsına salasynda ıordanııalyq Sana Pharma men ózge de kompanııalar qazaqstandyq naryqqa shyǵýǵa múddelilik tanytty. Buǵan qosa, Sana Farm men qazaqstandyq Inkar Group arasynda dári-dármekterdi dıstrıbýtsııalaý jóninde kelisimge qol qoıý kózdelip otyr.
Iordanııalyq DadVet pen qazaqstandyq KazbioPharm veterınarııalyq vaktsınalardy óndirý jáne eksporttaý salasynda áriptestikke kelisti.
Tsıfrlandyrý jáne bilim berý salasynda Astana Hub pen King Hussein Business Park, sondaı-aq Astana IT University men Hussein Technical University arasynda memorandýmdar júzege asyrylýda. Iordanııalyq alǵashqy stýdentter Astanada bilim ala bastady.
Sonymen qatar, «Ulttyq aqparattyq tehnologııalar» AQ (NIT) men Iordanııanyń ICT Intaj qaýymdastyǵy arasyndaǵy áriptestik damyp keledi.
Energetıka salasynda QR Energetıka mınıstrligi men Iordanııa Atom energetıkasy jónindegi komıssııasy beıbit atom energetıkasyn paıdalaný salasyndaǵy yntymaqtastyq týraly ózara túsinistik memorandýmyna qol qoıǵan.
Qurylys jáne ınvestıtsııa salasynda qazaqstandyq BI Construction Group ıordanııalyq Amman Vision Investment & Development (AVID) jáne Jordan Security Investment Fund qorymen kelisimderge qol qoıýǵa daıyndalyp jatyr. Jobalar ınfraqurylymdy jáne qalalyq ortany damytýǵa baǵyttalady.
Tikeleı áýe qatynasy týrızmge serpin beredi
Qazaqstan men Iordanııa arasyndaǵy tikeleı áýe reısterin ashý máselesi de basymdyqqa ıe.
QR Syrtqy ister mınıstrliginiń málimetinshe, quqyqtyq baza daıyn. Amman – Astana baǵyty boıynsha tikeleı reısterdi 2026 jylǵy maýsymda aptasyna eki ret ashý josparlanǵan.
Iordanııa tarapy alǵashqy kezeńde reısterdi sýbsıdııalaýǵa daıyn ekenin rastady.
«Áýe qatynasynyń ashylýy týrızmniń, bıznestiń jáne gýmanıtarlyq baılanystardyń damýyna jańa múmkindik beredi», – dep atap ótti ıordanııalyq dıplomatııalyq mıssııa.
Koroldiń saparynan ne kútemiz?
Sarapshylardyń pikirinshe, Korol Abdalla II ben ál-Hýseınniń Qazaqstanǵa sapary eki el qarym-qatynasynyń jan-jaqty sıpatyn rastaýmen qatar, energetıka, aýyl sharýashylyǵy, farmatsevtıka, tsıfrlandyrý jáne týrızm salalarynda naqty jobalardy iske qosýǵa serpin beredi.
Sonymen birge, tikeleı áýe qatynasy men atom energetıkasy boıynsha áriptestiktiń jańa kezeńi bastalýy múmkin.
Aıta keteıik, Iordanııa Koroliniń resmı sapary kezinde Astanada qaýipsizdik sharalary kúsheıtiledi.