Iordanııa Koroli Qazaqstanǵa resmı saparmen keldi
ASTANA. KAZINFORM — Prezıdent Qasym-Jomart Toqaevtyń shaqyrýymen Qazaqstanǵa Iordan Hashımıt Koroldiginiń Koroli II Abdalla ben ál-Hýseın resmı saparmen keldi. Astana áýejaıynda Iordanııa Korolin Memleket basshysynyń ózi kútip aldy.
Aqordada mártebeli meımandy qarsy alý rásimi bastaldy. Qasym-Jomart Toqaev pen II Abdalla ben ál-Hýseın bir-birine resmı delegatsııa múshelerin tanystyrdy. Odan keıin Qurmet qaraýyly rotasynyń komandıri saltanatty raport berdi.
Prezıdent orkestri Qazaqstan men Iordanııanyń memlekettik ánurandaryn oryndady.
Ánurandardy tyńdap bolǵan soń Qasym-Jomart Toqaev pen Iordanııa Koroli kilemshe boıymen Qazaqstan Respýblıkasynyń Memlekettik Týyna qaraı júrdi.
Tý aldyna kelgende meıman toqtap, bas ıip, óziniń qurmetin bildirdi. Sonan soń Iordanııa Koroli men Prezıdent qurmetti qaraýyl sapynyń boıymen júrdi.
Budan keıin taraptar shaǵyn quramda kelissózder júrgizýge kiristi. Joǵary deńgeıdegi kelissózderde saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy ekijaqty yntymaqtastyqty keńeıtý perspektıvasy talqylanady.
Sonymen birge, Iordanııa Koroli 6 qarasha kúni Astanada ótetin Aqaba protsesi sammıtine qatysady. Bul jıynǵa birqatar memlekettiń basshylary qatysady.
Aqaba protsesi — 2015 jyly Iordanııa koroli ІІ Abdalla bastamashy bolǵan halyqaralyq bastama. Onyń basty maqsaty — terrorızmge, ekstremızmge jáne transulttyq qylmysqa qarsy kúreste memleketter arasyndaǵy yntymaqtastyqty nyǵaıtý.
Eske sala ketsek, byltyr 26-27 tamyzda Iordanııa patshasy Qazaqstanǵa resmı sapar jasaǵan edi.
Óz kezeginde Prezıdent Qasym-Jomart Toqaev 2025 jylǵy aqpanda Iordan Hashımıt Koroldigine bardy.
