Iordanııa koroli eldiń basty máselelerine nazar aýdardy
ASTANA. KAZINFORM — Iordanııa koroli ІІ Abdalla taqta sóılegen sózinde Karaktaǵy terakt pen aımaqtaǵy kúrdeli jaǵdaıdy sóz etti.
Dúısenbi kúni Iordanııa koroli ІІ Abdalla Ammanda Ulttyq jınalystyń 20-shaqyrylymdaǵy úshinshi kezekti sessııasynyń ashylýynda halyqqa úndeý joldady. Monarh terrorızm qaýpi men Izraıldiń ekspansııalyq saıasaty týraly eskertip, strategııalyq ekonomıkalyq jáne sý jobalaryn iske asyrýdy jedeldetýdi talap etti.
ІІ Abdalla eń aldymen 23 qazanda Karak qalasynda adam ólimine ákelgen teraktige toqtaldy. Korol ekstremısterge qatań toıtarys beriletinin aıtyp, eldiń qaýipsizdigi men birligine nuqsan keltirýge jol berilmeıtinin atap ótti.
Monarh qarýly kúshter men qaýipsizdik organdaryn qoldaıtynyn bildirip, qaza tapqandardyń rýhyna qurmet kórsetti.
ІІ Abdalla sóziniń basym bóligin aımaqtaǵy ahýal men Palestına máselesine arnady. Onyń aıtýynsha, palestınalyqtardyń zańdy quqyǵy qamtamasyz etilmeıinshe, Taıaý Shyǵysta qaýipsizdik pen turaqtylyq ornatý múmkin emes.
Budan bólek korol Gaza sektoryndaǵy gýmanıtarlyq daǵdarystyń áli de jalǵasyp jatqanyn, sondaı-aq Izraıldiń Iordan ózeniniń Batys jaǵalaýy men Ierýsalımdegi áreketterin atap ótti.
— Izraıldiń basqynshylyq saıasaty óńirdiń bolashaǵyna jáne eldiń erteńgi kúnge degen senimine zor qater tóndiredi, — dedi ІІ Abdalla.
Sondaı-aq monarh Palestına máselesine qatysty Iordanııanyń ustanymy ózgermeıtinin jáne jalpy arab múddesin qorǵaýdy jalǵastyratynyn málimdedi.
El ishindegi máselelerge toqtalǵan ol parlament pen úkimet qabyldaıtyn sheshimderde azamattardyń múddesin basty nazarda ustaýdy talap etti.
Onyń aıtýynsha, qoǵam depýtattardyń qyzmetine qabyldaǵan zańdaryna ǵana emes, minez-qulqyna, jarııa málimdemelerine jáne qoǵamdyq múddeni qorǵaý qabiletine de qarap baǵa beredi.
Sonymen qatar korol ekonomıkany jańǵyrtý baǵdarlamasy boıynsha qolǵa alynǵan iri jobalardy jedeldetýdi tapsyrdy. Onyń sózinshe, bul bastamalar ulttyq ekonomıkany nyǵaıtyp, turaqtylyǵyn arttyrady ári Iordanııanyń óńirdegi yqpalyn kúsheıtedi.
ІІ Abdalla sý qaýipsizdigin memlekettik egemendiktiń basty sharttarynyń biri dep atap, bul máselege erekshe nazar aýdardy.
— Sý, sý jáne taǵy da sý! Sý qaýipsizdigi — ulttyq egemendigimizdiń basty tiregi. Iordanııa halqynyń sýǵa qol jetkizý quqyǵy qandaı da bir sebeppen shektelýine eshqashan jol bermeımiz, — dedi monarh.
Ol úkimetke sý jetkizý jobalaryn jalǵastyryp, sý resýrstaryn qorǵaý jáne keler urpaqqa saqtaý úshin aldyn alý sharalaryn ázirleýdi tapsyrdy.
Korol qorytyndylaı kele, memlekettik tártip pen zań ústemdigine de toqtalyp, laýazymdyq ókilettikti teris paıdalanýǵa bolmaıtynyn eskertti.
— Zań aldynda adamnyń aty da, laýazymy da, yqpaly da eskerilmeıdi, — dep atap ótti ІІ Abdalla.
Sóziniń sońynda monarh azamattardyń óz pikirin erkin bildirýine jáne qoǵamdyq talqylaýǵa qatysýyna quqyǵy bar ekenin rastady. Sondaı-aq óńirlik syn-qaterlerge qaramastan, ulttyq birlikti saqtaýǵa úndedi.
Iordanııa koroli parlamenttiń jańa sessııasy ashylǵanda dástúrli úndeý jarııalaıdy. Onda el saıasatynyń negizgi baǵyttary men zań shyǵarýshy jáne atqarýshy bıliktiń aldaǵy jumys basymdyqtary belgilenedi.
Buǵan deıin Iordanııa koroli Karaktaǵy shabýylǵa qatań jaýap beretinin málimdegenin jazǵan edik.
