Iordanııa Qazaqstanmen qaýipsizdik jáne ekonomıka salalarynda yqpaldastyqty keńeıtýge múddeli – ІІ Abdalla ben ál-Hýseın
ASTANA. KAZINFORM – Iordanııa Koroli ІІ Abdalla ben ál-Hýseın yqylaspen qarsy alǵany úshin Qasym-Jomart Toqaevqa alǵys aıtyp, Qazaqstan men Iordanııany burynnan kele jatqan qarym-qatynas, ózara qurmet, sondaı-aq beıbitshilik pen turaqtylyqty nyǵaıtý isindegi ortaq ustanym baılanystyratynyn jetkizdi.
– Ózińiz eske salǵandaı, byltyr bir-birimizdiń elimizge jasaǵan saparlarymyz ekijaqty qarym-qatynasty ilgeriletýge erekshe serpin berdi. Biz qol jetkizilgen ýaǵdalastyqtardy odan ári órbitip, saýda, ınvestıtsııa, týrızm, tehnologııa jáne qorǵanys sekildi negizgi baǵyttarda yntymaqtastyqty keńeıtýge nıettimiz, – dedi Iordanııa Koroli.
Sonymen birge, ІІ Abdalla ben ál-Hýseın Aqaba protsesi aıasyndaǵy kezdesýlerdiń jańa raýndyn birlese uıymdastyrǵany úshin Qasym-Jomart Toqaevqa shynaıy rızashylyǵyn bildirdi.
Onyń aıtýynsha, bul eki eldiń qaýipsizdik salasyndaǵy óńirlik jáne jahandyq syn-qaterlerdi sheshýge beıildigin kórsetedi.
Osy oraıda, Iordanııa Koroli óńirlik qaýipsizdikti qamtamasyz etý, sondaı-aq terrorızm men ekstremızmge qarsy kúres isinde Qazaqstanmen yqpaldastyqty keńeıtýge múddeli ekenin rastady.
Aıta keteıik, 6 qarashada Astanada Aqaba protsesi sammıti ótedi. Mundaı formattaǵy kezdesýge Ortalyq Azııa alǵash ret uıymdastyrýshylardyń biri retinde qatysyp otyr.
Aqaba protsesi — 2015 jyly Iordanııa koroli ІІ Abdalla bastamashy bolǵan halyqaralyq bastama. Onyń basty maqsaty — terrorızmge, ekstremızmge jáne transulttyq qylmysqa qarsy kúreste memleketter arasyndaǵy yntymaqtastyqty nyǵaıtý.
Buǵan deıin Prezıdent Qasym-Jomart Toqaev sessııanyń jasandy ıntellekt salasyndaǵy qaýipsizdik taqyrybyna arnalatynyn habarlady.
Búgin Prezıdent Qasym-Jomart Toqaevtyń shaqyrýymen Qazaqstanǵa Iordan Hashımıt Koroldiginiń Koroli II Abdalla ben ál-Hýseın resmı saparmen keldi. Astana áýejaıynda Iordanııa Korolin Memleket basshysynyń ózi kútip aldy.
Sondaı-aq Aqordada Qazaqstan Prezıdenti Qasym-Jomart Toqaev pen Iordanııa Koroli ІІ Abdalla ben ál-Hýseın kelissóz júrgizdi.
