Iordanııa Iran ushyrǵan 18 ballıstıkalyq zymyrannyń jolyn kesti
ASTANA. KAZINFORM – Óńirdegi qaqtyǵysqa baılanysty Iordanııanyń áýe keńistigindegi jaǵdaı áli de ýshyǵyp tur, dep habarlaıdy Kazinform agenttiginiń menshikti tilshisi.
Iordanııanyń áýe shabýylyna qarsy qorǵanys áskerleri sársenbige qaraǵan túni Irannan el aýmaǵyna qaraı ushyrylǵan 20 ballıstıkalyq zymyrannyń 18-in ustap, kózin joıdy. Qalǵan eki zymyran elsiz aımaqtarǵa qulaǵan, qaza tapqandar men zardap shekkender joq. Bul týraly Iordanııa Qarýly kúshteri málimdedi.
Osyǵan baılanysty zymyrannyń qırandylary túsken aýmaqtarǵa arnaıy bólimsheler jiberildi. Áskerıler turǵyndardy beımálim zattar men zymyran bólshekterine jaqyndamaýǵa jáne olardy baıqaǵan jaǵdaıda dereý bılikke habarlaýǵa shaqyrdy.
Málimdemede Iordanııanyń baqylaý, aldyn ala eskertý jáne Áýe shabýylyna qarsy qorǵanys áskerleri joǵary daıyndyq rejıminde jumys istep turǵany aıtylǵan.
Islam revolıýtsııasynyń saqshylar korpýsy (IRSK) zymyran soqqysynyń nysanasy retinde eldiń shyǵysyndaǵy ál-Azraq qalasy mańynda ornalasqan, AQSh áskeri paıdalanatyn Mýaffaq ás-Saltı áýe bazasy tańdalǵanyn málimdedi. Iran tarapynyń aıtýynsha, shabýyl F-35, F-16 jáne F-15 joıǵysh ushaqtary ornalasqan ári olarǵa qyzmet kórsetiletin nysandarǵa baǵyttalǵan.
AQSh ókili Reuters agenttigine bergen suhbatynda shabýyldyń kózdegen nysandaryna jeta almaǵanyn, sondaı-aq amerıkalyq áskerı qyzmetshilerdiń barlyǵynyń aman ekenin málimdedi. Irannyń áýe bazasyna keltirilgen shyǵyn týraly málimdemesin ázirge táýelsiz derekkózder rastaǵan joq.
Bul soqqy AQSh Ortalyq qolbasshylyǵy Parsy shyǵanaǵynda Irannyń bes munaı tasymaldaýshy kemesin joıǵanyn habarlaǵannan keıin jasaldy.
Vashıngton bul operatsııany IRSK-nyń AQSh áskerı kemesine ballıstıkalyq zymyrandarmen eki márte oq jaýdyrý áreketine qaıtarylǵan qatań toıtarys retinde baǵalady. AQSh tarapynyń málimetinshe, soqqy jasalmas buryn tankerlerdegi ekıpaj músheleriniń barlyǵy kemeden shyǵarylǵan.
IRSK óz kezeginde Tegeran «qaýipti ári tyıym salynǵan aımaq» dep jarııalaǵan Ormýz buǵazynan ótpek bolǵan AQSh-tyń 2 kemesi men 8 munaı tankerine soqqy jasalǵanyn málimdedi.
AQSh pen Iran arasyndaǵy qaqtyǵystyń qaıta órshýi Parsy shyǵanaǵyndaǵy keme qatynasynyń qaýipsizdigine qatysty alańdaýshylyqty kúsheıtti. Sonyń áserinen Brent markaly munaıdyń baǵasy barreline 100 dollarǵa jaqyndady.
Aqpan aıynda bastalǵan AQSh pen Izraıldiń Iranǵa qarsy soǵysy kezinde Iordanııadaǵy áskerı bazalarǵa Iran tarapynan buǵan deıin de soqqylar jasalǵan. Shildedegi sońǵy shabýyldardyń birinde AQSh-tyń eki áskerı qyzmetshisi qaza tapty.
Aıta keteıik, buǵan deıin Iran Ormýz buǵazy mańynda arnaıy baqylaý aımaǵyn quratynyn jazǵan edik.
Aqzat Jıenalına
