Iordanııa halqy palestınalyqtardy qoldap, kóshege shyqty
AMMAN. QazAqparat – Myńdaǵan ıordanııalyq Palestına halqyn qoldap, sap túzep, Iordanııa-Izraıl shekarasyna bettedi, dep habarlaıdy QazAqparat.
Juma kúni ıordanııalyqtar Ammandaǵy Izraıl elshiliginiń aldynda narazylyq aktsııasyn ótkizdi. Olar Palestınahalqyn qoldap, Izraıl áskeriniń Gaza sektorynda áskerı operatsııany toqtatýyn talap etti.
Sherýge Iordanııa halqymen birge, saıası partııalar, qoǵamdyq jáne dinı uıymdardyń ókilderi de qatysty. Sherýshilerdiń arasynda bir top Iordanııa men Izraıl shekarasyna jaqyn ornalasqan Karama soǵysynda qaza tapqandardyń Memorıalyna qaraı bet alǵan bolatyn. Budan soń sherýshiler palestınalyqtarmen birge Izraılge qarsy turý úshin shekarashylardan joldyń ashýyn talap etti. Sherýshilerdiń keıbiri tipti shekara asýǵa umtyldy, alaıda Iordanııa áskeri olardy toqtatty.
Mundaı demonstratsııalar Iordanııanyń ózge de qalalarynda ótip jatyr. Narazylyq aktsııalary qalalardyń ortalyqtarynda, jolaıryqtarda jáne meshitterdiń alańdarynda ótip jatyr.
«Iordanııalyqtardyń búgin ótkizip jatqan narazylyq aktsııalary men sherýleri olardyń palestınalyq baýyrlar men qasıetti Ál-Aqsa meshitin qoldaıtynyn kórsetedi jáne bul Iordanııa turǵyndarynyń tabandy tarıhı ustanymy»,-dedi BAQ jónindegi memlekettik mınıstr jáne Úkimettiń resmı ókili Saher Dýdın.
«Ótip jatqan sharalar ıordanııalyqtardyń ustanymynyń birligin kórsetedi. Iordanııa halqy búgingideı álemdi pandemııa jaılaǵan qıyn-qystaý ýaqytqa qarmastan búgingi sherýdi ótkizý qajet dep tapty»,-dep qosty saıasatker.
S.Dýdınniń sózinshe, halyq sherýi mártebeli korol II Abdalla kúsh salyp otyrǵan saıası jáne dıplomatııalyq baǵytty tolyqtyra túsedi. Korol Ierýsalımdi qashanda qaýip aýmaǵy dep atap kelgen. Al Izraıl óziniń dóreki de zańsyz saıasatymen óńirdegi jaǵdaıdy odan saıyn shıelenistirip otyr jáne osy arqyly búkil óńirdiń qaýipsizdigine qaýip tóndirýde.
Osyǵan deıin dinı mereke kezinde Izraılde 10 adamnyń qaza tapqanyn jazǵan bolatynbyz.
Sondaı-aq Izraıl Gaza sektoryndaǵy jaǵdaıdyń shıelenisýine baılanysty rezervtegi 9 myń sarbazdy áskerge shaqyrdy.
