Iordanııa halqy 30 mamyrǵa deıin demalatyn boldy
ASTANA. KAZINFORM – Iordanııa koroldigi táýelsizdiginiń 80 jyldyǵyn atap ótýde, dep habarlaıdy Kazinform-nyń Ammandaǵy tilshisi.
Iordanııa 1946 jylǵy 25 mamyrda Ulybrıtanııa mandaty aıaqtalǵannan keıin resmı túrde táýelsiz memleket bolyp jarııalanǵan.
Osyǵan baılanysty Iordanııa koroli Abdalla II ıbn ál-Hýseın el turǵyndaryn ulttyq merekemen quttyqtady.
– Qymbatty ıordanııalyq otbasy, Táýelsizdik kúni qutty bolsyn. Qudaı sizderdi jáne bizdiń maqtanyshymyz – Iordanııany qorǵaı kórcin, – delingen monarhtyń dúısenbi kúni turǵyndarǵa SMS arqyly joldaǵan úndeýinde.
Koroldi ulttyq merekemen arab, ıslam jáne ózge de dostas memleketterdiń basshylary quttyqtaǵan. Sondaı-aq quttyqtaýlar Iordanııanyń taq murageri ál-Hýseın bın Abdalla II atyna da joldanǵan.
Iordanııa premer-mınıstri Djafar Hasan eldiń óńirlik daǵdarystar men túrli syn-qaterlerge qaramastan damý men jańǵyrý jolyn jalǵastyryp jatqanyn aıtty. Onyń sózinshe, sońǵy segiz onjyldyqta Iordanııa memlekettik ınstıtýttaryn nyǵaıtyp, turaqtylyqty saqtap, bilim berý, densaýlyq saqtaý, ınfraqurylym jáne ekonomıka salalarynda aıtarlyqtaı jetistikke jetken.
El boıynsha resmı jáne halyqtyq merekelik is-sharalar uıymdastyrylyp jatyr. Qala kósheleri men alańdary memlekettik týlarmen bezendirilgen.
Bılik kontsertter, mádenı baǵdarlamalar men jappaı merekelik sharalar ótkizýde.
Merekelik is-sharalar keshke Amman qalasyndaǵy otshashýmen aıaqtalady.
Sonymen qatar Iordanııa úkimeti táýelsizdik kúninen keıin Qurban aıt merekesine baılanysty uzaq demalys jarııalady. Merekelik demalys 30 mamyrǵa deıin jalǵasady.
Aıta keteıik, buǵan deıin Qazaqstan Prezıdenti Iordanııa korolin el táýelsizdiginiń 80 jyldyǵymen quttyqtaǵan bolatyn.
