Iordanııa Gazadaǵy palestınalyqtardyń qonys aýdarýyna qarsy ustanymyn qaıtalady

ASTANA. KAZINFORM – AQSh prezıdenti Donald Tramp Aq úıde Iordanııa Koroli II Abdallany qabyldady, dep habarlaıdy BBC. 

Kezdesý Tramptyń palestınalyqtardy Gaza sektorynan qonystandyrý josparynyń bóligi retinde eger palestınalyq bosqyndardy qabyldamasa, Amerıkanyń Iordanııaǵa kómegin toqtatamyz dep qorqytqannan bir kún ótken soń ótti.

Abdalla ІІ onyń eli qaterli isikke shaldyqqan 2 myńǵa jýyq palestınalyq balany qabyldaýǵa daıyn ekenin, biraq basqa jaǵdaıda Amerıka prezıdentiniń josparlaryn qoldamaıtynyn málimdedi. 

— Men Iordanııanyń Gaza sektory men Batys jaǵalaýda turatyn palestınalyqtardyń qonys aýdarýyna qarsy berik ustanymdy qaıtaladym. Bul — arabtardyń birtutas ustanymy. Gaza sektoryn turǵyndaryn kóshirmeı qaıta qurý jáne aýyr gýmanıtarlyq jaǵdaıdy sheshý barlyǵynyń basymdyǵy bolýy tıis, - dep málimdedi Abdalla II kelissózderden keıin áleýmettik jelide. 

Tramptyń ózi Iordanııa korolimen Gaza sektoryndaǵy jaǵdaı týraly «tamasha áńgimelesý» júrgizgenin aıtty.

Saýd Arabııasy Gazadan palestınalyqtardy yǵystyrý áreketinen bas tartty.