Iordanııa áýe keńistigin ýaqytsha japty
ASTANA.KAZINFORM — Izraıldiń Irannyń áskerı jáne ıadrolyq nysandaryna jasaǵan soqqysynan keıin Iordanııa bıligi koroldiktiń áýe keńistigin ýaqytsha japty, dep habarlaıdy Kazinform tilshisi.
Iordanııanyń Azamattyq avıatsııa basqarmasy barlyq kiris, shyǵys jáne tranzıttik reıster saqtyq sharasy retinde toqtatyldy dep málimdedi.
— Patshalyqtyń áýe keńistigi ýaqytsha jabyldy jáne aımaqtyq shıelenisýden týyndaıtyn kez kelgen qaýip-qaterdiń aldyn alý maqsatynda barlyq áýe kemesiniń qozǵalysy toqtatyldy, — delingen resmı málimdemede.
Iran 100-den astam dron ushyrǵan kezde Iordanııanyń astanasy Ammanda sırenalar oınady.
Iordanııalyq BAQ eldiń áýe keńistigin buzǵan birneshe dron ustalǵanyn habarlady. Koroldik áýe kúshteri patshalyqtyń aspanyn qorǵaý úshin belsendi patrýldik qyzmetti bastady.
Úkimet ókili jáne kommýnıkatsııa mınıstri Mýhammad Mýmanı Iordanııanyń óz áýe keńistigi men aýmaǵyn áskerı operatsııalar úshin paıdalanýǵa «ruqsat etpegenin» aıtty.
— Eshkimniń Iordanııanyń qaýipsizdigine, onyń aýmaqtyq tutastyǵyna jáne azamattarynyń ómirine qaýip tóndirýine jol berilmeıdi, — dedi Mýmanı juma kúngi málimdemesinde.
Mýmanı jalǵan aqparat pen jańylystyrýshy beınerolıkterdi taratýdan saqtanyp, halyqty tek resmı derekkózderden aqparat alýǵa shaqyrdy.
Iordanııanyń Syrtqy ister mınıstri Aıman as-Safadı jeke málimdemesinde Izraıldiń Iranǵa shabýylyn aıyptap, ony halyqaralyq quqyqty buzatyn jáne aımaqty «úlken soǵystyń shetine» ıtermeleıtin «arandatýshylyq áreket» dep atady.
Ol mundaı shabýyldardyń eshkimge qaýipsizdik ákelmeıtinin aıtyp, turaqtylyqty tek dıplomatııa, halyqaralyq quqyq normalaryn saqtaý jáne memleketterdiń egemendigin qurmetteý ǵana qamtamasyz ete alatynyn aıtty.
Ushýlardy qalpyna keltirý týraly sheshim jaǵdaıdyń ári qaraı qalaı órbýine baılanysty qabyldanady. Bılik turǵyndardy sabyrǵa shaqyryp, azamattyq qorǵanys qyzmetteriniń nusqaýlaryn oryndaýǵa shaqyrdy.
Aıta keteıik, juma kúni túnde Izraıldiń Iran aýmaǵyna jappaı soqqy berýine jaýap retinde Tegeran Izraılge júzden astam dron ushyrdy.
Taıaý Shyǵystaǵy jaǵdaıdyń ushyǵýyna baılanysty elshilik Izraıldegi Qazaqstan azamattaryna úndeý jasady.