Iordanııa áskerı qoımasyndaǵy jarylystyń aldyn ala sebebi ataldy
AMMAN. QazAqparat – Búgin tańerteń Iordanııanyń Ez-Zarka qalasynyń mańyndaǵy jaramdylyq merzimi ótken mınometter qoımasynda qýatty jarylys boldy. Iordanııa Hashımıt Koroldigi Qarýly Kúshteriniń (IHK) oqıǵa týraly resmı derekteri jaıynda «QazAqparat» HAA-nyń Taıaý Shyǵystaǵy tilshisi habarlaıdy.
Áleýmettik jelilerde beınejazbalar men fotosýretter arqyly taraǵan qaýesetter ıordanııalyqtardyń alańdaýshylyǵyn kúsheıtti.
IHK Densaýlyq saqtaý mınıstri Saad Djaber qoımadaǵy jarylystan keıin shuǵyl túrde memlekettik qalalyq aýrýhanaǵa baryp, mekemeniń jarylystan keıin bolýy yqtımal zardap shegýshilerdi qabyldaý daıyndyǵyn tekserdi.
«Jarylys at-Tafıhtyń oqshaýlanǵan aımaǵynda ornalasqan Ez-Zarka qalasynyń mańyndaǵy merzimi ótken jáne paıdalanýǵa jaramsyz oq-dárilerdiń bólshektelgen qoımasynda boldy. Adam ólimi tirkelgen joq, materıaldyq zalal keltirildi. Alǵashqy tergeý málimetterine sáıkes, jarylys óte joǵary aýa temperatýrasynan týyndaǵan. Mundaı temperatýra mınomet snarıadyndaǵy hımııalyq elementtiń reaktsııasyn týdyryp, jarylys oryn aldy», – delingen Iordanııa Qarýly Kúshteriniń Bas qolbasshylyǵynyń málimdemesinde.
Jarylý qaýpi bar qaldyqtardyń joqtyǵyna kóz jetkizý úshin búkil aýmaq aldyn ala qorshalyp, tekserildi. Turǵyndarǵa bul aýmaqqa jaqyndamaý eskertildi.
«Adam ólimi jáne jaralanǵandar joq. Nysan aınalasyndaǵy keıbir jabdyqqa jáne eski mehanızmderge zııan keltirildi. Qarýly Kúshter – oqıǵa týraly resmı aqparatty taratýdyń jalǵyz kózi. Azamattardy keıbir buqaralyq aqparat quraldary men áleýmettik jeliler taratqan qaýesetterge nazar aýdarmaýǵa shaqyramyn», – dedi general Talal ál-Gýbeın.
Óz kezeginde Qoǵamdyq qaýipsizdik basqarmasy azamattardy eski derekter men qaýeset taratpaýǵa, olar úshin sot jaýapkershiligi qarastyrylǵanyn qatań eskertti. Qazir taratylyp jatqan keıbir beınejazbalar men fotosýretter eskirgen jáne bir jyl buryn bolǵan oqıǵalardan alynǵan.
