Iordanııa ÁÁK koroldik aýmaǵynda eki drondy atyp túsirdi
ASTANA. KAZINFORM – Iordanııa Koroldik áskerı-áýe kúshteri dúısenbi kúni tańerteń el aýmaǵyna qaraı baǵyt alǵan eki ushqyshsyz ushý apparatyn áýede joıdy, dep habarlaıdy Kazinform agenttiginiń menshikti tilshisi.
Iordanııa Qarýly kúshteri Bas qolbasshylyǵy resmı ókiliniń málimdeýinshe, oqıǵa saldarynan zardap shekkender men materıaldyq shyǵyn tirkelmegen. Bul týraly Petra agenttigi habarlady.
Oqıǵa ornynan drondardyń qaldyqtaryn jınaý úshin Koroldik ınjenerlik ásker bólimsheleri jiberildi. Mamandar olardyń synyqtaryn zalalsyzdandyryp, qaýipsizdik talaptaryna sáıkes aýmaqty qorshaýǵa aldy.
– Koroldiktiń Qarýly kúshteri eldiń áýe keńistigin baqylaýdy jalǵastyryp, memleket pen onyń azamattarynyń qaýipsizdigine tónýi múmkin kez kelgen qaterge jedel áreket etý úshin joǵary jaýyngerlik ázirlik deńgeıin saqtap otyr, – delingen resmı málimdemede.
Keıin Iordanııanyń Qoǵamdyq qaýipsizdik basqarmasy atyp túsirilgen drondardyń biriniń bólshekteri Kerak provıntsııasyndaǵy turǵyn úıge qulaǵanyn habarlady. Oqıǵa saldarynan eshkim zardap shekken joq. Arnaıy qyzmetter qajetti tehnıkalyq jumystardy júrgizip, oqıǵa ornynda qaýipsizdikti qamtamasyz etti.
Ázirge shabýyl úshin jaýapkershilikti eshbir tarap óz moınyna alǵan joq.
Buǵan deıin dúısenbi kúni Izraıl qorǵanys armııasy Iordanııa shekarasy mańynda anyqtalǵan eki ushqyshsyz ushý apparatyn ustap qalǵanyn málimdegen bolatyn. Izraıl tarapynyń dereginshe, drondar eldiń áýe keńistigine kirmegen, olardyń shyqqan tegi anyqtalyp jatyr.
Iordanııa buǵan deıin de AQSh pen Iran arasyndaǵy áskerı shıelenis aıasynda eldiń áýe keńistigine kirgen nemese oǵan jaqyndaǵan zymyrandar men ushqyshsyz ushý apparattaryn birneshe ret atyp túsirgen. Iran óńirdegi amerıkalyq áskerı nysandarǵa soqqy jasaǵanyn málimdegen edi.
