IOAI-2026: sheteldik qatysýshylardyń pikiri qandaı
ASTANA. KAZINFORM — Elordada ótip jatqan Halyqaralyq jasandy ıntellekt olımpıadasyna 106 memlekettiń jastary keldi. Ár eldiń komandasynda tórt qatysýshydan bar. Sheteldik úmitkerlerdiń keıbirin áńgimege tartyp, olımpıadaǵa daıyndyǵy, josparlary jóninde suraǵan edik.
Malaızııanyń Penang shtatynan kelgen Ishýan Loý — 19 jastaǵy stýdent, bolashaq JI salasynyń mamany. Ol halyqaralyq deńgeıdegi JI jarysyna alǵash ret qatysyp otyrǵanyn aıtady.
— Astanada ótip jatqan olımpıadaǵa naýryz aıynan bastap daıyndaldyq. Bul úshin arnaıy oqý-jattyǵý jıyndary uıymdastyryldy. Komandalastarymmen birge dáris tyńdadyq jáne zerthanalyq jumystardy atqardyq. Jasandy ıntellektige qatysty tujyrymdamalardy meńgerdik. Jıǵan bilimimiz ben tájirıbemizdi osy saıys barysynda qoldanamyz, — deıdi Ishýan.
Sonymen birge, IOAI-2026 úlken múmkindikterge jol ashatynyn atap ótti.
— Bul olımpıadanyń mańyzy zor dep oılaımyn. Sebebi, dúnıe júzindegi qatarlastarymyzben tanysyp, tájirıbe almasamyz. Baılanys ornatqan soń, bolashaqta birlesip jumys isteýimiz de múmkin, — deıdi ol.
Malaızııalyq óren Qazaqstan qatty unaǵanyn aıtady.
— Bul eldiń halqy óte meıirimdi, qalanyń ǵımarattary zamanaýı, taǵamdary dámdi eken. Qazaqstan men Malaızııa tehnologııalyq baǵytta damyp kele jatyr. Qos el de JI salasyna asa mán berip, zamanaýı tehnologııalardy órkendetýde, — dep túıindedi ol.
Al Portýgalııadan kelgen Martın Karmelo 17 jasta. Mektepte birneshe jyldan beri baǵdardamaýdy jáne Python tilin oqyp, bul salaǵa kóp ýaqyttan beri mashyqtanyp júr.
— Menińshe, Halyqaralyq jasandy ıntellekt olımpıadasynyń mańyzy orasan. Óıtkeni, tájirıbeń artady. Adam retinde de, maman retinde de ósesiń. Bul — óz qabiletińdi dáleldeýge múmkindik beretin alań. Bolashaqta JI men bıznes sektorlaryn baılanystyryp, úlken kompanııa qurýdy armandaımyn, — deıdi ol.
Sonymen birge, portýgalııalyq oqýshy Qazaqstanǵa kelgennen keıingi áserin aıtyp berdi.
— Halyqtyń bári janashyr, meıirimdi sekildi kórinedi. Jergilikti taǵamdardy jep kórdim, dámdi eken. Jalpy, osy olımpıadaǵa jınalǵan ártúrli elderdiń jastarymen áńgimelestim. Ózim adamdarmen aralasqandy jaqsy kóremin. Bári unap jatyr, — dedi ol.
Aıta keteıik, buǵan deıin IOAI-2026 JI olımpıadasyna 106 eldiń komandasy jınalǵanyn jazǵanbyz.
