IOAI-2026: Astanada ótetin JI olımpıadasyna 106 eldiń komandasy jınaldy
ASTANA. KAZINFORM – 2-8 tamyz aralyǵynda Astanada jasandy ıntellekt boıynsha IOAI-2026 halyqaralyq olımpıadasy ótedi. Bul – jasandy ıntellekt, mashınalyq oqytý jáne tsıfrlyq tehnologııalar salasyndaǵy daryndy oqýshylardy anyqtaýǵa arnalǵan halyqaralyq ǵylymı doda.
Alǵash ret IOAI 2024 jyly Býrgas qalasynda (Bolgarııa) ótip, oǵan 32 el men aýmaq qatysty. JI boıynsha ekinshi halyqaralyq olımpıada Beıjińde (QHR) ótti, oǵan 61 el men aýmaq qatysty. Al bıyl Qazaqstan astanasynda ótetin saıysqa 106 elden kelgen 500-ge jýyq mektep oqýshysy qatysady. Іs-sharaǵa 200-ge jýyq volonter qatysady.
IOAI 2026 baǵdarlamasy eki negizgi baǵytty qamtıdy. Jeke baıqaýda qatysýshylar JI jáne mashınalyq oqytý esepterin jeke sheshedi, algorıtmder men derekterdi taldaýdaǵy jeke tájirıbesin kórsetedi. Al komandalar úılestirýdi jáne shyǵarmashylyq tásilderdi qajet etetin kúrdeli JI esepterin birlesip sheshedi.
Sondaı-aq Global AI Talent Empowerment baıqaýy úshin bólek nátıjeler kestesi bar. Bul – JI boıynsha ǵylymı olımpıadalarǵa qatysý tájirıbesi shekteýli elder men aýmaqtarǵa osy saladaǵy talanttardy damytýǵa kómektesý úshin ázirlengen IOAI-dyń qoldaý baǵdarlamasy.
Tapsyrmalar mashınalyq oqytý, tabıǵı tildi óńdeý, kompıýterlik kórý, derekterdi taldaý jáne jasandy ıntellekt negizinde sheshimderdi praktıkalyq ázirleý baǵyttaryn qamtıdy. Olımpıada mazmuny irgeli daıyndyq pen qoldanbaly daǵdylardy ushtastyrady.
– Biz osy olımpıada úshin Qytaıdan arnaıy 10 robot aldyrdyq. Qatysýshylar robottardy ózderi baǵdarlamalap, ázirlegen baǵdarlamalaryn osy robottarǵa júkteıdi jáne olardyń jumysyn qazylar alqasyna kórsetedi. Keıin qazylar alqasy nátıjelerdi baǵalap, sheshim shyǵarady. Mundaı jobalardyń basty maqsaty – oqýshylardyń jasandy ıntellektige, baǵdarlamalaýǵa jáne kompıýterlik tehnologııalarǵa qyzyǵýshylyǵyn arttyrý, – dedi Qazaqstannyń sporttyq baǵdarlamalaý federatsııasy (CPFed) prezıdenti Baǵdat Mýsın.
Qazaqstannyń sporttyq baǵdarlamalaý federatsııasy el ishindegi irikteý jarystaryn ótkizedi jáne qazaqstandyq oqýshylardyń sheteldik baıqaýlarǵa saıysyn uıymdastyrady.
Qazaqstan quramasy segiz oqýshydan jasaqtalǵan. Olar elimizdiń ár óńirinen iriktelip, matematıka men ınformatıka pánderi boıynsha úzdik nátıje kórsetken daryndy jastar. Byltyr Beıjińde ótken Jasandy ıntellekt boıynsha halyqaralyq olımpıadada Qazaqstan quramasy úsh altyn, bir kúmis jáne úsh qola medal jeńip alyp, jalpy 7 júldege qol jetkizdi jáne 4-orynǵa ıe boldy.
– Qazaqstanda JI olımpıadasy endi ǵana qarqyn alyp keledi. Al ınformatıka olımpıadalary elimizde ondaǵan jyldan beri ótkizilip keledi. Sol jarystarda shyńdalǵan kóptegen qazaqstandyq túlek búginde Google, Microsoft sekildi álemdik tehnologııalyq kompanııalarda eńbek etedi. Olımpıadaǵa daıyndyq barysynda biz olardy shaqyryp, qatysýshylarmen birlesken jattyǵýlar uıymdastyrdyq, tájirıbelerimen bólisýge múmkindik jasadyq. Byltyr Qytaıda ótken JI olımpıadasynda Qazaqstan quramasy jalpykomandalyq esepte 4-oryn ıelendi. Alaıda ol kezde jarysqa 60-qa jýyq el qatysqan bolatyn. Bıyl Astanada ótetin olımpıadaǵa 106 memleketten ókil kelmek. Bul – Qazaqstan úshin úlken mártebe ári halyqaralyq qaýymdastyqtyń seniminiń kórinisi, – deıdi B.Mýsın.
Olımpıada aıasynda ıÝNESKO ókilderiniń qatysýymen JI etıkasyna arnalǵan tanystyrylymdar, Qazaqstannyń ulttyq JI ekojúıesimen tanysý jáne mádenı baǵdarlama uıymdastyrylady.
Aıta keteıik, elimizde jasandy ıntellekt pen startapty damytý boıynsha halyqaralyq ınnovatsııalyq hab qurylady.
