«Injınırıng jáne tehnologııalar transferti ortalyǵy» AQ-nyń tólengen jarǵylyqty kapıtaly 9,7 mıllıard teńgeni qurady
ASTANA. Shildeniń 22-si. QazAqparat /Rýslan Ǵabbasov/ - Qazirgi kezde «Injınırıng jáne tehnologııalar transferti ortalyǵy» AQ-nyń tólengen jarǵylyqty kapıtaly 9,7 mıllıard teńgeni qurady. Bul týraly búgin Astanada Indýstrııa jáne jańa tehnologııalar mınıstrliginiń 6 aı qyzmetiniń qorytyndylary men ekinshi jartyjyldyq josparlaryna arnalǵan alqa májilisinde «Injınırıng jáne tehnologııa transferti» AQ-nyń basqarma tóraǵasy Saıat Núsipov aıtty.
Atap aıtqanda, bul qarjy tehnoparkterdi qurýǵa jáne jabdyqtaýǵa, salalyq konstrýktorlyq bıýrolardy qurýǵa, sheteldik joǵary tehnologııalyq kompanııalardyń aktsııalaryn alýǵa jáne basqa da mańyzdy jobalarǵa baǵyttalmaq.
Injınırıng jáne tehnologııalar transferti ortalyǵynyń basty maqsaty - elimizdegi ındýstrııalyq-ınnovatsııalyq damytýdy júzege asyrý, otandyq kásiporyndardyń basqarýshylyq, tehnıkalyq jáne tehnologııalyq deńgeıin jańǵyrtý bolyp tabylady. Al, negizgi baǵyttar, - jańa tehnologııalar ınjınırıngisin, bıznes ınkýbatorlaý, tehnologııalar transferti jáne ınnovatsııalyq ınfraqurylymdy damytý.
