Injener-pedagog mamandardyń jalaqysy áli de tómen - senator
ASTANA. QazAqparat - Kásiptik tehnıkalyq bilim berý oryndaryndaǵy ınjener-pedagogtardyń jalaqysy áli de tómen. Búgin Senattyń jalpy otyrysynda Eńbek daǵdylaryn damytý jáne jumys oryndaryn yntalandyrý jónindegi joba týraly kelisimdi talqylaý barysynda depýtat Murat Baqtııaruly osy máseleni kóterdi.
«Kásiptik tehnıkalyq bilim berý oryndaryndaǵy ınjener-pedagogtardyń jalaqysy áli de tómengi deńgeıde qalyp otyr. Sondyqtan da, joǵary bilikti mamandar bul salada az. Biz oqý standarttaryn halyqaralyq deńgeıge sáıkestendirgenimizben, oqytýshy ınjenerlerdiń, oqytýshy sheberlerdiń eńbegin yntalandyrmaı otyrmyz. Bul tetik jasalmaıynsha, jobalarymyzdyń nátıjeleri kútilgen deńgeıde bolmaýy da múmkin», dedi M. Baqtııaruly.
Aıta keteıik, Senat qabyldaǵan «Qazaqstan Respýblıkasy men Halyqaralyq Qaıta Qurý jáne Damý banki arasyndaǵy qaryz týraly kelisimdi (Eńbek daǵdylaryn damytý jáne jumys oryndaryn yntalandyrý jónindegi joba) ratıfıkatsııalaý týraly» Zańynda tehnıkalyq jáne kásiptik bilim berýdiń, oqytýdyń jáne joǵary bilim berý baǵdarlamalarynyń ózektiligin arttyrý kózdeledi. Bul rette jobaǵa Halyqaralyq Bankten 100 mln dollar qaryz bólinbek. Jobany 2020 jyldyń 30 maýsymyna deıin aıaqtaý josparlanǵan.
